Россияда уч турдаги вируслар тарқалмоқда

Россияда грипп, COVID-19 ва ўткир респиратор вирусли инфекциялар (ЎРВИ) билан касалланиш ҳолатлари кўпайди, деб хабар беради Каzinform агентлиги «Известия» газетасига таяниб.

Бу ҳақда Роспотребнадзор ва Смородинцев грипп илмий-тадқиқот институти маълум қилди.

Нашрнинг аниқлашича, касалланиш даражаси ҳар 10 000 аҳолига 128,1 ҳолатни ташкил этган, бу бошланғич кўрсаткичдан 83 фоизга юқори. Шу нуқтаи назардан, мутахассислар Россияда уч вирусли эпидемия бошланганини тан олишди.

Уларнинг фикрича, ҳозирда асосан А (H3N2) гриппи тарқалмоқда.

Махсус тадқиқотчилар февраль-март ойларида вируснинг тарқалиш тезлиги пасайиши мумкинлигини тахмин қилмоқда.

Роспотребнадзор 2023 йилнинг 18-24 декабрь кунларида инфекция даражаси яна 5 фоизга ошгани ҳақида хабар берди. Бундан ташқари, Смородинцев грипп илмий-тадқиқот институти ноябрь ойининг бошидан буён касалланишнинг босқичма-босқич ўсишини маълум қилди. Аввалроқ юқумли касалликлар бўйича мутахассис Ирина Давидова 2024 йилда янги пандемия учун ҳеч қандай шарт-шароит йўқлигини айтган эди.