Россия Федерациясининг Тверь вилоятида ҳалокатга учраган самолёт бортида Евгений Пригожин бўлган

МОSKVA. ТАSS-Кazinform - Тверь вилоятида 23 август куни Куженкино қишлоғи яқинида бизнес-жет қулаб тушди. Самолёт бортида 10 киши — уч учувчи ва етти нафар йўловчи бўлган, уларнинг барчаси ҳалок бўлган. йўловчилар рўйхатида Евгений Пригожин бор эди. Бу ҳақда Федерал ҳаво транспорти агентлиги маълум қилди, дея хабар беради Kazinform TASSга таяниб.

Шунингдек, Федерал ҳаво транспорти агентлиги маълумотларига кўра, бортда Сергей Пропустин, Евгений Макарян, Александр Тотмин, Валерий Чекалов, Николай Матюсеев ва уч нафар экипаж аъзоси бўлган: самолёт командири Алексей Левшин, иккинчи учувчи Рустам Каримов, стюардесса Кристина Распопова.

Чекалов аввалроқ АҚШ санкциялар рўйхатида Пригожинга яқин шахс сифатида тилга олинган эди.

«Embraer-135 (EBM-135BJ) самолётининг парвози ҳаво ҳудудидан фойдаланишга белгиланган тартибда берилган рухсатнома асосида амалга оширилди», — дейилади ҳаво транспорти федерал агентлиги хабарида.

ТАССнинг хабар беришича, ҳаво транспорти федерал агентлиги ҳалокат юзасидан суриштирув ишларини бошлаган. Воқеа жойида ҳуқуқ-тартибот идоралари ва Фавқулодда вазиятлар вазирлиги вакиллари иш олиб бормоқда.

Россия Тергов қўмитасининг Бош тергов бошқармаси 263-моддаси йўл ҳаракати хавфсизлиги ва ҳаво транспортидан фойдаланиш қоидаларини бузиш бўйича жиноий иш қўзғатди.