Россия билан ҳамкорлик сув ресурсларидан самарали фойдаланишга мутаносиб ёндашиш гарови бўлади – ҚР Президенти

Россия билан стратегик ҳамкорлигимиз сув ресурсларидан самарали фойдаланишга мутаносиб ёндашиш гаровидир. Бу ҳақда Қозоғистон ва Россиянинг ХIХ ҳудудлараро ҳамкорлик форумида Давлат раҳбари Қасим-Жомарт Тоқаев маълум қилди, дея хабар беради Kazinform.

“Иқтисодиётимизнинг асосий тармоқларида, айниқса, қишлоқ хўжалигида катта миқдорда сув ишлатилаётгани вазиятни янада мураккаблаштирмоқда. Мутахассисларнинг фикрича, 2050 йилга бориб Марказий Осиёда қурғоқчилик ва сув тошқинлари ҳосилдорликни 30 фоизгача камайтириши мумкин. Қишлоқ хўжалигимиз сувнинг 60 фоиздан ортиғини истеъмол қилади ва сувни тежайдиган технологияларни кенг жорий этишни талаб қилади. Бу энг долзарб вазифа. Бу танқидий ҳолатларга жавобан биз сув хўжалигини модернизация қилишга киришдик. 20 та янги сув омбори қуриш, камида 15 та сув омборини реконструкция қилиш, шунингдек, 3500 км дан ортиқ каналларни модернизация қилиш ва рақамлаштириш режалаштирилган. Бу чора-тадбирлар 2027 йилгача қўшимча 2 куб километр сув билан таъминлайди”, — деди Қасим-Жомарт Тоқаев.

Давлат раҳбари Қозоғистонда янги Сув кодекси ишлаб чиқилаётганини айтди.

“Ушбу ҳужжат сув ресурслари тақчиллигини камайтиришга қаратилган. Россия билан Жайиқ ва Иртиш каби йирик дарёлар ҳавзаларида тадқиқот олиб бориш юзасидан ҳамкорликни жонлантириш бўйича қўшма йўл харитаси амалга оширилмоқда. Бундай мураккаб муаммони ҳал қилиш учун фақат бир давлатнинг саъй-ҳаракатлари етарли эмас. Бу муаммони манфаатлар мувозанатини сақлаш ва биргаликда ҳаракат қилиш орқали ҳал қилиш керак. Фурсатдан фойдаланиб, Россия билан стратегик ҳамкорлигимиз сув ресурсларидан ҳар икки давлат халқи манфаати йўлида самарали фойдаланишга мутаносиб ёндашиш гарови бўлишига ишонаман”, — деди Қасим-Жомарт Тоқаев.