Пуэрто-Рикода 1,4 миллион киши электрсиз қолмоқда

ASTANA. Kazinform – Luma Energy компанияси вакили Уго Соррентини Пасха байрами арафасида сайёҳлар кўплаб келаётган Пуэрто-Рикода электр қуввати узилиши ҳақида баёнот берди. Унинг сўзларига кўра, нафақат турар-жой биноларида, балки аэропортлар ва айрим шифохоналарда ҳам ёруғлик йўқ, деб ёзади Anadolu.

Соррентини маълумотларига кўра, 330 мингга яқин одам ичимлик суви олишда қийналмоқда. Электр тармоқларини тиклаш ишлари олиб борилаётган бўлса-да, узилишнинг аниқ сабаблари ҳали аниқланмаган. Электр узилиши Пуэрто-Рикодаги тахминан 1,4 миллион кишининг ҳаётига салбий таъсир кўрсатди.

Маҳаллий ҳокимият жабрланувчиларнинг шикоятлари 72 соат ичида кўриб чиқилишини маълум қилди.

Пуэрто-Рико губернатори Женнифер Гонсалес ҳам мамлакатни узоқ вақт электрсиз қолдирган Luma Energy билан шартномани бекор қилиш ҳақида ўйлаётганини маълум қилди.

Эслатиб ўтамиз, Шри-Ланкада маймун электр станциясига кириб кетиб, мамлакатни электрсиз қолдирганини ёзган эдик.