Профессионал боксда жаҳон чемпиони бўлишни хоҳлайман - Иван Дичко
ASTANА. Кazinform – Қозоғистонлик профессионал боксчи, супероғир вазн тоифасидаги чарм қўлқоп устаси Иван Дичко Рудний шаҳридаги кичик спорт залида катта спортга илк қадам ташлади. Ҳозир машҳур спортчи профессионал рингда қатнашиб, халқаро миқёсда совринларни қўлга киритмоқда. У Kazinform мухбирига профессионал боксдаги йўли ва келажакдаги мақсадлари ҳақида гапириб берди.
- Иван, қандай қилиб боксга кириб қолдингиз?
- 15 ёшга тўлганимда дўстларим билан спорт залига келдим. Ўша пайтда бу Руднийда яхши анъанага айланган эди. Ҳаммамиз боксга эътибор қаратдик. Ўшандан бери ушбу спорт тури билан шуғулланаман. Айтганча, менинг иккита катта акам бор. Улар ҳам менинг танловимга таъсир қилган бўлса керак.
- Биринчи мураббийингиз ким бўлган?
- Маҳаллий мутахассис Юрий Анатольевич Янов — менинг биринчи мураббийим. Ҳозиргача Руднийдаги бокс мактабида ишлайди. Шундан сўнг Владимир Иванович Шайер менинг шахсий мураббийим бўлиб ишлади. Бу мутахассис мени Осиё чемпионатлари, жаҳон чемпионатлари ва Олимпия ўйинларида медаллар сари бошлади. Ўша инсоннинг самарали меҳнати туфайли ҳаваскор боксда кўплаб муваффақиятларга эришдим.
- Фаолиятингиздаги энг эсда қоларли воқеани эслай оласизми?
- Албатта, 2012 йилги Олимпиадани алоҳида таъкидлашим мумкин. Бу - катта мусобақа мен учун ажойиб тажриба. Буни ҳаётдаги жуда ёрқин, қизиқарли ва муҳим воқеа деб ҳисоблаш учун асос бор.
- Биринчи юқори савиядаги жангларингиз қандай кечган?
- Аниқ бир нарса дейиш қийин. Дарҳақиқат, нафақат биринчи жанг, балки ҳар бир жанг ҳам осон кечмаган. Ҳар бир рақибга жисмонан ва руҳий жиҳатдан тайёрланиш керак. Муҳим турнирларда осон жанглар бўлмайди.
- Ҳаваскор ва профессионал боксга тайёргарликнинг асосий фарқи нимада?
- Профессионал боксда бор этиборингизни битта рақибга қаратасиз. Фақат битта жанг бўлади. Ҳаваскор бокс турнирида эса бир нечта жангларда куч сарфлаш керак. Уларнинг услуби ҳар хил. Бундай учрашувлар бир неча кун давом этади. Иккаласи бутунлай фарқ қилади, уларнинг ҳар бирига алоҳида ёндашиш керак.
- Нега профессионал боксга ўтишга қарор қилдингиз?
- Бу сизга ҳаваскор боксдаги фаолиятингизни мантиқан якунлаш имконини беради. Ҳали ҳам боксга бўлган иштиёқим тўхтамаганини ҳис қилардим. Шунинг учун мен давом этишни яхшироқ деб ўйладим. Мақсадим — профессионал боксда чўққига чиқиш ва жаҳон чемпиони бўлиш. Бу — менинг орзуим, унинг устида ишлашни давом эттиришим ва қаттиқ ишлашим керак. Ҳатто профессионал спортда ҳам турли натижалар мавжуд. Аммо бу қандай бўлишидан қатъи назар ажойиб натижа ҳисобланади. Шунинг учун, кўп нарсаларни ўрганиш керак, шундагина олдинга силжиш мумкин.
- Ҳозир қаерда ва ким билан шуғулланяпсиз?
- Бўлажак жангга тайёргарлик Питсбургда (Пенсильвания, АҚШ) таниқли мураббий Том Янкелло бошчилигида олиб борилмоқда. У ўтмишда кичик Рой Жонс ва бошқа машҳур чемпионларга йўл очиб берган малакали мутахассис. Мен Boxing Stars компанияси бошқарув жамоаси билан ҳам ишлайман.
- Боксдан ташқари хоббийингиз борми?
– Тўғриси, асосий хоббийим – ишим. Мен севган ишимни қилаётганимдан хурсандман. Қолган вақтларда эса ҳамма каби кино кўраман, китоб ўқийман ва интернетда бемалол ўтираман. Мен боксни кузатиб бораман, айниқса, руднийлик болалар ва бокс мактаби битирувчиларини.
Иван Дичко - Қозоғистон Республикасида хизмат кўрсатган спорт устаси (2012), ҳаваскор бокс бўйича Олимпия ўйинларининг икки карра бронза медали совриндори (2012, 2016), уч карра жаҳон чемпионати совриндори (2011, 2013, 2015), Осиё чемпиони (2013), Инчхондаги Осиё ўйинлари чемпионии (2014), Гуанчжоудаги Осиё ўйинлари финалчиси (2010).
Бир ҳафта олдин қозоғистонлик боксчи Иван Дичко бир йиллик танаффусдан сўнг яна профессионал боксга қайтди. У Вашингтонда (АҚШ) бўлиб ўтган профессионал бокс мусобақасининг асосий жангида америкалик Сэмюэл Кросс билан жанг қилди. Оғир вазндаги жанг саккиз раундга мўлжалланган эди. Жанг биринчи раунддаёқ техник нокаут билан қозоғистонлик фойдасига ҳал бўлди. Бу - Иван Дичконинг профессионал боксдаги 15-ғалабаси (шундан 13 таси нокаут билан).
