Президент Ақтўбе аэропортида логистика маркази ташкил этилишини қўллаб-қувватлади
ASTANA. Kazinform — Қасим-Жомарт Тоқаев S Sistem Lojistik компанияси директорлар кенгаши раиси Ҳусейн Барлинни қабул қилди, дея хабар беради Kazinform Ақордага таяниб.
Учрашувда компания билан логистика соҳасида ўзаро манфаатли ва узоқ муддатли ҳамкорлик алоқаларини ўрнатиш истиқболлари муҳокама қилинди.
Давлат раҳбари мамлакатни Евроосиёдаги етакчи транзит хабга айлантириш мақсадида Ўрта йўлакни ҳар томонлама ривожлантириш бўйича ишлар бошланганини таъкидлади.
Қасим-Жомарт Тоқаев S Sistem Lojistik компаниясининг Ақтўбе халқаро аэропортида логистика марказини ташкил этиш ташаббусини ҳам қўллаб-қувватлади. Лойиҳа “Қазпочта” АЖ билан ҳамкорликда амалга оширилади.
Ҳусейн Барлин лойиҳа доирасида амалга оширилаётган ишлар ҳақида гапирди. Унинг сўзларига кўра, келажакда компания ўз бизнесини Астана, Алмати, Чимкент ва Ақтауда кенгайтиришни режалаштирмоқда.
Президент логистика инфратузилмасини ҳар томонлама ривожлантириш муҳимлигини таъкидлади, бу эса транзит вақтини қисқартириш ва экспорт имкониятларини яхшилаш имконини беради.
S Sistem Lojistik — Туркиянинг етакчи логистика инновацион ташкилоти. Компания Истанбул, Анқара, Измир ва Анталия аэропортларида, шунингдек, бошқа жойларда умумий майдони 100 минг квадрат метр бўлган омборлар тармоғини бошқаради.
Эслатиб ўтамиз, Қозоғистон Президенти Туркияга расмий ташриф билан боргани ҳақида хабар берган эдик.
Шунингдек, ҚР Президенти YDA Holding компанияси бошқаруви раиси Ҳусейн Арсланни қабул қилди.
