Португалия ва Испанияда электр таъминоти тикланди

ASTANA. Kazinform – Кечаги оммавий электр таъминотидаги узилишдан сўнг Португалия ва Испанияда электр таъминоти тизимлари тиклана бошлади. 29 апрель, сешанба куни эрталаб Испаниянинг REE энергетика компанияси мамлакат материк қисмида электр энергиясининг 90 фоизга яқини тиклангани ҳақида хабар берди, деб ёзади DW.

Испаниянинг Red Elеctrica оператори аниқлик киритишича, истеъмолчи талаби ҳозирда 99,16 фоизга қондирилмоқда, мамлакатдаги барча подстанциялар нормал ишламоқда.

“Икки мамлакатнинг тармоқ операторлари носозлик сабабини аниқлаш ва электр таъминотини тиклаш устида ишламоқда. Ҳозирда ҳеч қандай киберҳужум белгилари йўқ”, – деди Европа кенгаши президенти Антонио Кошта.

AFP хабарига кўра, Португалиянинг REN тармоқ оператори бир кечада 6,5 ​​миллион уйнинг 6,2 миллионига электр таъминоти тикланганини маълум қилган.

28 апрель, душанба куни миллионлаб аҳоли, жумладан Мадрид ва Лиссабон аҳолиси электр энергиясиз қолди. Испания, Португалия, Франциянинг жануби-ғарбий қисми ва Андоррада йирик носозликлар юз берди.

Электр узилиши туфайли метро ва поездлар тўхтаб қолди, светофорлар ўчди, интернет ва мобиль алоқа узилиб қолди, одамлар лифтларда қолиб кетди. Биргина Мадриднинг ўзида қутқарувчилар 286 та қутқарув операциясини амалга оширди. Испаниянинг Adif темир йўл компанияси мамлакат бўйлаб поездлар ҳаракати тўхтатилганини тасдиқлади.

Испания Транспорт вазирлиги маълумотларига кўра, ўн битта поезддан йўловчиларни эвакуация қилиш ўн соатдан кейин ҳам якунланмаган.

Испания аэропортларида парвозлар кечикиши кузатилди. Eurocontrol маълумотларига кўра, электр энергиясидаги узилиш Мадрид, Барселона ва Лиссабон билан ҳаво қатновига таъсир қилган.

Эслатиб ўтамиз, аввалроқ Испания ва Португалия электр энергиясисиз қолгани ҳақида хабар берган эдик.