Польша Болтиқ денгизида биринчи шамол станциясини қуради
ASTANA. Kazinform – Кўмирга энг қарам мамлакатлардан бири бўлган Польша энди тоза энергияга ўтмоқда, деб хабар берди Euronews.
36 миллион аҳолига эга Польша электр энергиясининг катта қисмини кўмирдан оларди. Энди, Европа Иттифоқига раислик қилаётган Польша қазиб олинадиган ёқилғига қарамлигини камайтиришни мақсад қилган.
Бош вазир Дональд Туск ҳукумати мамлакат жанубидаги самарасиз конларни босқичма-босқич ёпишни режалаштирмоқда. Айни пайтда мамлакатнинг шимолий Болтиқбўйи қирғоғида қайта тикланадиган энергия жадаллиги кузатилмоқда.
Бош вазирнинг котиби Игнаций Немчицкий Euronews телеканалига берган интервьюсида шамол станциясининг ишлаш муддати 30 йилгача бўлишини ва лойиҳа Польшанинг энергия алмашинувида муҳим рол ўйнашини айтди:
"Бизда энди кўмир йўқ ва биз учинчи мамлакатлардан импортга қарам бўлишни хоҳламаймиз", – деди Немчицкий.
Унинг сўзларига кўра, Польша иқтисодиёти учун қайта тикланадиган энергия манбалари, атом энергетикаси ва газга сармоя киритиш энергетика тизимининг барқарорлигини таъминлашнинг самарали усули ҳисобланади.
Baltic Power – Польшадаги етакчи оффшор лойиҳаси
Ушбу лойиҳа ORLEN ва Канаданинг Northland Power компанияси ўртасидаги қўшма корхонадир. Электр станцияси Болтиқбўйининг Хочево ва Леба шаҳарлари яқинида, қирғоқдан 23 км узоқликда жойлашган. Лойиҳанинг умумий қуввати 1140 мегаваттга етиши кутилмоқда. Бу 1,5 миллионга яқин Польшалик уй хўжаликларини электр энергияси билан таъминлайди.
Ядро энергетикаси ҳам кун тартибида
Польша қайта тикланадиган энергия билан чекланмайди. Мамлакатда биринчи атом электр станциясини қуриш режалари собиқ “Қонун ва адолат” (PiS) партияси ҳукумати даврида бошланган ва ҳозирги Бош вазир Дональд Туск коалицияси томонидан давом эттирилмоқда.
Бундан ташқари, Немчицкий Польша кичик модулли реактор (SMR) лойиҳаларини кўриб чиқаётганини ва Канададаги пилот лойиҳаларни диққат билан кузатиб бораётганини айтди. Бундай реакторлар 300 мегаваттгача энергия ишлаб чиқариши мумкин.
“Келгуси 15 йил ичида Польша энергетика тизими сезиларли ўзгаришларга учрайди. Атом энергетикаси асосий энергия манбаига айланса-да, қайта тикланадиган энергия ва газ мослашувчанлик ва барқарорликни таъминлайди”, – деди Немчицкий.
