Покистонда гаровга олинган поезддан 300 дан ортиқ йўловчи озод қилинди

Покистон ҳарбийлари Балужистон вилоятида йўловчи поездида Балужистон озодлик армияси (БОА) жангарилари томонидан гаровга олинган 300 дан ортиқ кишини озод қилди, деб хабар беради BBC.

Расмийларга кўра, Кветтадан Равалпиндига кетаётган Jaffar Express поездида 400 га яқин одам бўлган. Операция давомида 33 нафар жангари йўқ қилинди.

Жангарилар туннелга кираверишда темир йўлнинг бир қисмини портлатиб, поездга қарата ўт очган. БОА баёнотида айтилишича, гаровга олинганлар орасида тинч аҳоли ҳам, хавфсизлик кучлари ҳам бор. Уларни қатл қилиш билан таҳдид қилиб, БОА сиёсий маҳбусларини озод қилишни талаб қилишди.

Темир йўл полицияси зобитларидан бири ВВCга ҳужумчилар поездга ракета отганини кўрганини айтди. У ва унинг ҳамкасблари қарийб бир ярим соат қаршилик кўрсатишга уринган, бироқ қўлга олинган. Унинг сўзларига кўра, жангарилар ҳам ҳарбийларни, ҳам тинч аҳолини ўлдирган – у камида 60 жасадни санаб ўтган.

БОА – бу Балужистон учун мустақиллик ва унинг ресурслари устидан назоратни талаб қилувчи исёнчи ташкилот. АҚШ, Буюк Британия ва Европа Иттифоқи мамлакатларида террорчи сифатида тан олинган. Жангарилар ўтган йили минтақада қатор ҳужумлар уюштирган, жумладан, ноябрь ойида Кветта бекатида поездда портлаш содир бўлган ва ўнлаб одамлар ҳалок бўлган.

Сешанба куни қуролланган шахслар тўққизта вагонда 425 йўловчи бўлган Jaffar Express поезди Гудалар ва Пиру Кунри тоғли ҳудудлари яқинидаги Машкаф туннелидан ўтаётганда ўт очган.

Бунгача Покистонда гаровга олинган поезддан 150 дан ортиқ йўловчи қутқарилгани ва 27 нафар террорчи йўқ қилингани ҳақида ёзган эдик.