Перунинг шимолида 3800 йиллик тарихга эга қадимги шаҳар кашф этилди

ASTANA. Kazinform – Перунинг Уаура провинциясида, пойтахт Лимага яқин ҳудудда археологлар томонидан милоддан аввалги 1800 йилларга тааллуқли Пенико номи билан маълум бўлган қадимги шаҳар топилди. Бу ҳақда CNN хабар берди.

Тадқиқотчиларнинг фикрича, Пенико стратегик жойлашувга эга бўлиб, у қирғоқбўйи аҳоли пунктларини Анд тоғлари ва Амазонка дарёсининг водийлари билан боғловчи асосий йўл устида жойлашган. Археологик қазишмалар натижасида 18 та иншоот, жумладан, турар-жой бинолари ва жамоат бинолари аниқланган.

Айрим жамоат биноларида маросимлар учун мўлжалланган турли артефактлар – лойдан ясалган ҳайкаллар, ибодат ашёлари ва «путутус» деб номланган қобиқлардан тайёрланган қувурлар топилган.

Пенико Америкадаги энг қадимий цивилизациялардан бири ҳисобланган Карал маданияти таназзулидан кейин вужудга келган. Карал-Супа номи билан ҳам машҳур бўлган ушбу маданият Перуда милоддан аввалги 2600-2000 йиллар даврида гуллаб-яшнаган.

Олимлар Пенико шаҳрининг ривожланишига гематит — ёрқин қизил рангга эга минерал модда савдоси туртки берган деб ҳисоблайди. Бу минерал керамик буюмлар, ғор суратлари ва диний маросимларда инсон танасига белгилар тушириш учун ишлатилган.

Ҳозирда Пенико ҳудуди сайёҳлар учун қисман очиқ бўлиб, бу ердаги археологик ишлар қарийб 8 йил давом этган.

Эслатиб ўтамиз, бунгача Перуда 9 миллион йил аввал яшаган акуланинг суяклари топилгани ҳақида хабар бердик.