Озарбайжон Покистондан қирувчи самолётлар сотиб олади ва мамлакатга 2 миллиард доллар сармоя киритади

ASTANA. Kazinform — Озарбайжон Покистон билан мудофаа соҳасидаги алоқаларни мустаҳкамлашдан манфаатдор ва бу мамлакатга 2 миллиард доллар сармоя киритишга тайёр, деб хабар беради Kazinform мухбири.

Бу ҳақда Покистон ахборот вазири Аттаулла Тарар маҳаллий ОАВга берган интервьюсида айтиб ўтди.

“Озарбайжон тез орада Покистондан JF-17 Thunder қирувчи самолётларининг биринчи партиясини олади ва келажакда бу самолётларни биргаликда ишлаб чиқариш мумкин”, — деди вазир.

Унинг таъкидлашича, Озарбайжон президенти Илҳом Алиев Покистон билан мудофаа алоқаларини мустаҳкамлашга катта қизиқиш билдирган ва бу давлатга 2 миллиард доллар сармоя киритишга ваъда берган.

Бундан ташқари, Тарар инвестициялар бўйича музокаралар якуний босқичда эканлигини таъкидлади ва Президент Алиевнинг апрель ойида Исломободга ташрифи чоғида тегишли келишувлар имзоланиши режалаштирилганлигини тасдиқлади.

“Озарбайжон Президенти Покистон мудофаа саноати ва инфратузилмасини ривожлантиришдан манфаатдор эканлигини билдирди. Шунингдек, музокаралар чоғида автомобиль йўллари қурилиши ва бошқа йирик лойиҳалар ҳам кўриб чиқилди”, - деди у.

Эслатиб ўтамиз, 23-25 ​​февраль кунлари Покистон Бош вазири Муҳаммад Шаҳбоз Шариф давлат ташрифи билан Озарбайжонда бўлди. Ташриф давомида мудофаа ва ҳарбий саноат соҳасидаги ҳамкорликдан ташқари, иқтисодий ҳамкорликни кенгайтириш юзасидан музокаралар олиб борилди. Давлат раҳбарлари Бокуда бўлиб ўтган Покистон-Озарбайжон бизнес форумида ҳам иштирок этди.