ОАВ: Ўзбекистонлик олимлар помидордан коронавирусига қарши вакцина яратди
«Помидор озиқ-овқат сифатида ишлатилганда, ошқозонимизда ҳужайраларда парчаланиб, антитана ҳосил қилади. Тажриба доирасида биз Ўзбекистонда топилган коронавирусни олиб, унинг бир қисмини клонладик ва уни ўсимлик ҳужайрасига киритиш орқали синовдан ўтказдик. Натижада, вакцина ҳақиқатан ҳам ўсимлик ҳужайраларидан ажраталмоқда», - дейди Марказ директори Забардаст Бўриев.
Унинг сўзларига кўра, озиқ-овқат вакцина яратиш амалиёти Россия ва Канадада сут ва маккажўхори каби маҳсулотларда қўлланилади. Уларнинг клиник синовлари якунланиш арафасида.
Марказ директорининг сўзларига кўра, помидорда синтезланган коронавируснинг S-оқсили ошқозон орқали ичакка кириб, иммунитет тизимини рағбатлантиради. Ҳосил бўлган антитаналар патоген билан кураша бошлайди. Бундай вакциналар болалар учун жуда мос келади.
Вакцина ҳозирда лабораторияда якунланиш босқичида. Кейин у сичқон, қуён ва каламуш каби ҳайвонларда синаб кўрилади ва натижалари таҳлил қилинади. Режага кўра, синовлар жорий йилда якунланади.
Мутахассисларнинг фикрича, коронавирусга қарши эмлаш ҳозир Канадада тамаки ва маккажўхори, Россияда эса биокефир, яъни сут маҳсулотларидан олинади. Вакцина маҳсулоти ошқозон орқали ичакка ўтади ва ичакда антитаналарнинг сўрилиши натижасида организмда иммун тизимининг ишлаши туфайли коронавирусга қарши иммунитет пайдо бўлади.
