Нега хорижликлар Қозоғистондаги олий ўқув юртларини танлайдилар
ASTANA. Kazinform – Қозоғистон олий таълим соҳасида Осиёдаги энг йирик хаблардан бирига айланмоқда. Нега хорижлик талабалар Қозоғистонни танлайди? Фан ва олий таълим вазирлиги Kazinform агентлиги мухбирининг саволига жавобан хорижлик талабаларни мамлакатга жалб этувчи бир қанча асосий омилларни аниқлади.
Таълим олиш имконияти
Қозоғистонда таълим дастурлари - қозоқ, рус ва инглиз тилларида тақдим этилади. Бу турли тилларда сўзлашадиган ва турли маданиятлардан келган талабаларга ўқиш учун қулайлик яратади. Университетлар инглиз тилидаги дастурларни фаол равишда жорий қилмоқдалар, бу айниқса Жанубий Осиё ва Яқин Шарқ талабалари учун жуда муҳимдир.
Иқтисодий самарадорлик
Қозоғистонда ўқиш ва яшаш нархи Европа, АҚШ ва баъзи Осиё мамлакатларига қараганда анча паст. Бу эса арзон нархларда сифатли таълим олиш имконини беради.
Стипендия дастурлари
2019 йилдан бошлаб Қозоғистонда чет эллик талабалар, жумладан, Қозоғистон фуқаролигига эга бўлмаган этник қозоқлар учун давлат стипендиялари дастури амалга оширилмоқда. Бу мамлакатда таълимни янада қулай ва жозибадор қилди.
Дипломларни тан олиш
Қозоғистонда олий ўқув юртлари дипломларининг халқаро миқёсда тан олинишини таъминлаш борасида фаол ишлар амалга оширилмоқда. Лиссабон конвенциясининг ратификация қилиниши Қозоғистон дипломларининг 55 та давлатда, жумладан Европа давлатлари, АҚШ, Канада ва Австралияда тан олинишини таъминлади. Шунингдек, 2010 йилдан бери Қозоғистон Болония жараёнининг тўлақонли аъзоси бўлиб, Европа таълим стандартларига жавоб беришга ёрдам берди.
Осиё-Тинч океани минтақаси билан интеграция
Ҳозирда Қозоғистонда олий таълим соҳасидаги малакаларни тан олиш тўғрисидаги Токио конвенциясига қўшилиш тўғрисидаги қонун қабул қилинмоқда. Бу Хитой, Япония, Жанубий Корея, Индонезия ва Австралия каби мамлакатларда дипломларнинг соддалаштирилган ҳолда тан олинишига йўл очади. Бундай интеграция академик мослашувни жадаллаштириш, ўзаро таълим алмашинув дастурларини кенгайтириш, қўш диплом лойиҳаларини амалга ошириш ҳамда Қозоғистон университетларининг QS Asia ва THE Asia рейтингларида юқорига кўтарилишини таъминлайди.
Буларнинг барчаси Қозоғистонни нафақат Шарқ ва Ғарб ўртасидаги транзит нуқтаси, балки академик таълим учун ҳам муҳим платформага айлантиради.
