Наврўзнома: Қозоғистон — аҳил халқлар диёри
ASTANА. Кazinform – Бугун — Наврўзнома доирасида бирдамлик куни. Наврўз нафақат баҳор байрами, балки жамиятда ҳамжиҳатлик ва бирдамликни мустаҳкамловчи муҳим ижтимоий-маданий ҳодисадир. Кazinform мухбири Қозоғистон халқларининг умумий жиҳатларига нигоҳ ташлади.
Наврўз байрами мамлактдаги барча миллат вакилларини янгиланиш, ҳамжиҳатлик, эзгулик каби қадриятлар орқали бирлаштиради. Бирдамликни мустаҳкамлашга ёрдам берадиган бир қанча асосий жиҳатлар мавжуд:
- Умумий анъаналар ва қадриятлар. Наврўз байрами баҳорги янгиланиш ва янги ҳаёт, дўстлик ва тинчлик рамзидир. Бу Қозоғистонда яшовчи барча этник гуруҳларга яқин байрамдир.
- Меҳмондўстлик ва дастурхон ёйиш. Байрамларда одамлар бир-бирларини меҳмонга таклиф қилишади, миллий таомлар тайёрлашади, миллий бирдамликни мустаҳкамлашади.
- Маданий хилма-хиллик. Байрам доирасида концертлар, ярмаркалар, миллий ўйинлар ўтказилади. Турли этник гуруҳлар ўз урф-одатлари, миллий либослари ва анъаналарини намойиш этадилар.
- Бирлик ва тинчлик ғояси. Қозоғистон турли миллат вакилларининг бир том остида тинч-тотув яшаши билан машҳур, Наврўз эса миллатлараро тотувлик, ўзаро ҳурмат ва ижтимоий бирлик рамзи ҳисобланади.
- Умумий жамоат сайллари. Байрам кунлари Қозоғистон халқи кўчага чиқиб, оммавий байрам қилади. Бу маданий чегараларни бартараф қилади, миллатлар ва элатлар вакиллари ўртасидаги дўстона муносабатларни мустаҳкамлайди.
Сенат депутати Геннадий Шиповских таъкидлаганидек, Қозоғистон — аҳил халқларнинг диёри.
– Наврўз — бутун қозоғистонликларни бирлаштирадиган байрам. Бугун қозоқларнинг Янги йили, десак муболаға бўлмайди, чунки тенгкунлик 22 мартга тўғри келади. Наврўз байрамини ўн кунлик нишонлаш тасдиқланди. Унинг доирасида ҳар бир кун ўзига хос тарзда нишонланади. Наврўзномадаги ҳар бир тадбир халқлар ўртасидаги ўзаро ҳурмат ва эҳтиромни оширади, Қозоғистонда тинчлик ва тотувликни мустаҳкамлашга хизмат қилади.
Шунингдек, меҳр-оқибат, меҳмондўстлик ва хайрия Наврўзнинг асосий қадриятлари ҳисобланади, чунки бу нафақат қозоқ халқи, балки мамлакатдаги барча этник гуруҳлар учун умумий тамойиллардир. Шунинг учун ҳам Қозоғистонда Наврўз байрами халқлар ўртасидаги дўстлик рамзи сифатида нишонланади. Чунки миллати, динидан қатъи назар, ҳамма бир-бирини ҳурмат қилади, ҳамкорликни кучайтиришга ҳисса қўшади. Шундай қилиб, Наврўз байрами Қозоғистон халқи ўртасидаги дўстлик ва ҳамжиҳатликни мустаҳкамлаб, юрт тинчлигини янада сақлашга хизмат қилмоқда. Шахсан мен Наврўз байрамини интиқлик билан кутаман, бу менинг қалбимга яқин, – деди депутат.
У оиласи Наврўз байрамини қандай нишонлаши ҳақида ҳам гапириб берди.
– Байрамларда хотиним Наврўз гўжаси , бешбармоқ пиширади. Марказий майдонга чиқамиз, халқ билан байрам қиламиз, Наврўз гўжасини ичамиз, — дейди у.
Наврўз байрамини интиқлик билан кутаётган ҳамюртларимиздан бири Қозоғистон халқи Ассамблеяси вакили, немис этномаданий бирлашмаси аъзоси, “Возрождение” жамоат фонди васийлик кенгаши раиси ўринбосари Владислав Вебердир.
– Мен Шимолий Қозоғистон вилоятидаги қишлоқда ўсганман. Наврўз байрамини қишлоқ бўлиб нишонлаганимизни болалигимдан биламан. Мактабда байрам концерти бўларди, маданият уйида турли тадбирлар бўларди, бундан ташқари миллий спорт турлари бўйича мусобақалар ўтказилар, қишлоқ четига чиқиб мусобақаларни томоша қилардик. Наврўз Қозоғистондаги барча миллатларни бирлаштирган байрамдир, — деди у.
Ассамблея вакили байрамларни кам кўрмаслигини таъкидлаб, қалбига яқин бўлган учта байрамни номлади.
- Рождество, Наврўз ва Пасха. Наврўз байрамида биз қозоқ дўстларимизга ташриф буюрамиз, Пасха байрамида эса улар бизга ташриф буюришади. Наврўз байрамини дўстлик кўприги дейиш мумкин. Шу куни анъанага кўра гўшт, бўғирсоқ пиширамиз, қимиз ичамиз. Маданий тадбирларда миллий либосларда ҳам қатнашамиз, – дейди Владислав Вебер.
Қозоғистон халқи ассамблеяси халқлар бирдамлигини янада чуқурлаштиришда алоҳида ўрин тутади. Давлат раҳбари таъкидлаганидек, Қозоғистон халқи Ассамблеяси давлатчилик ва бирдамлик асосларини мустаҳкамловчи асосий институтдир. ҚХА миллатлараро алоқаларнинг умуммиллий платформаси бўлиб, у давлат ва жамоат тузилмалари тизимидаги ўрни билан биринчи навбатда давлат органлари ва жамоат институтларининг имкониятларини мувофиқлаштиради.
Айтиш жоизки, бугунги кунда мамлакатда 21 та этномедиация маркази ва 21 та этномедиация кенгаши фаолият кўрсатмоқда. Худди шундай, этномедиация марказлари ва кенгашлари ходимлари ҳам тузилди, улар таркибига профессионал медиаторлар, ҳуқуқшунослар, ўқитувчилар, психологлар, дин олимлари, журналистлар, жамоатчилик фикри етакчилари кирди.
Йирик шаҳарлардан ташқари қишлоқ округлари ҳокимлари, участка инспекторлари, мактаб директорлари ва раҳбарлари, ҳар бир аҳоли пункти имом-хатиблари, ҳудудий этномедиация кенгашлари аъзолари, Ассамблея вакиллари учун этноммедиация асослари бўйича семинар-тренинглар ўтказилмоқда.
Эслатиб ўтамиз, ўтган йилдан бошлаб юртимизда Наврўз байрами Наврўзнома шиори остида ўн кун кетма-кет нишонланиб келинмоқда.
Одатдагидек бу йил ҳам Наврўз байрами мамлакат бўйлаб кенг миқёсда нишонланади, юзлаб маданий тадбирлар ўтказилади.
