Мирзиёев Орол минтақасида Иқлим технологиялари халқаро экспо-хабини ташкил этишни таклиф қилди

Биз Орол ҳудудини экологик инқироз зонасидан инновациялар, технологиялар ва янги имкониятлар ҳудудига айлантириш ниятидамиз. Дубайда бўлиб ўтган БМТнинг Иқлим ўзгариши бўйича конференцияси сессиясида Ўзбекистон Президенти шундай ташаббус билан чиқди, деб хабар беради Kazinform агентлиги President.uzга таяниб.

Шавкат Мирзиёев нутқи аввалида иқлим ўзгариши барқарор ривожланиш учун энг муҳим таҳдид эканини айтиб, Орол фожиаси оқибатларини алоҳида таъкидлади.

“Иқлим муаммолари барқарор ривожланиш йўлида энг асосий таҳдидга айланиб улгурди. Бу хавф-хатарлар ҳатто дунё геосиёсий архитектурасига ҳам таъсир кўрсатмоқда. Иқлим ўзгаришининг салбий оқибатлари Орол фожиаси туфайли Марказий Осиёда айниқса жиддий сезилмоқда. Минтақамизда ҳаво ҳароратининг ошиши жаҳондаги ўртача кўрсаткичдан икки баравар кўпдир. Фавқулодда иссиқ кунлар сони 2 марта ортди, музликлар майдонининг учдан бир қисми йўқолди. Тупроқ емирилиши жараёнлари 30 миллион аҳоли турмуш тарзига салбий таъсир кўрсатмоқда. Кучли чанг ва қум бўронлари одатий ҳолга айланди. Ичимлик суви тақчиллиги, ҳаво ифлосланиши, биохилма-хиллик йўқолиши, қишлоқ хўжалиги ҳосилдорлиги пасайиши каби муаммолар тобора авж олмоқда”, — деди Мирзиёев.

Бу муаммони ҳал этиш мақсадида Ўзбекистон Президенти Орол ҳудудини инқирозли ҳудуддан ривожланган ҳудудга айлантириш ташаббусини илгари сурди.

“Париж шартномаси доирасида Иқлим ўзгаришига мослашиш соҳасидаги Глобал ҳадли механизмни тезроқ келишиш тарафдоримиз. Биз Марказий Осиё иқлим мулоқоти платформасида Адаптация стратегиясини ишлаб чиқмоқдамиз. Кеча “Йўқотиш ва зарарлар” жамғармасини ташкил этиш бўйича қабул қилинган муҳим қарорни юксак баҳолаймиз. Бирлашган Миллатлар Ташкилотининг резолюцияси асосида Оролбўйи ҳудудини экологик офат зонасидан “инновациялар, технологиялар ва янги имкониятлар минтақаси”га айлантирмоқчимиз. Бу ерда Иқлим технологиялари халқаро экспо-хабини яратишда яқин ҳамкорликка таклиф этаман”, – дея ташаббус кўрсатди Ўзбекистон раҳбари.

Шавкат Мирзиёев глобал миқёсда паст углеродли иқтисодиётга ўтиш масаласини эътибордан четда қолдирмаслик кераклигини айтди. Шу билан бирга, ривожланаётган мамлакатлар манфаатларини ҳисобга олиш муҳимдир. Унинг сўзларига кўра, бу борадаги таклифлар доимий асосда “Катта еттилик” (G7) ва “Катта йигирмалик” (G20) форматларида кўриб чиқилиши керак.

Мирзиёев нутқ сўнгида БМТ билан ҳамкорликда 2024 йилда Ўзбекистонда “Иқлим миграцияси” мавзусида конференция ўтказиш режалаштирилганини маълум қилди.