Microsoft'дан Аврора сунъий интеллекти
Microsoft анъанавий об-ҳаво прогнозлаш тизимларидан устун бўлган янги Аврора сунъий интеллект моделини жамоатчиликка тақдим этди. Ушбу илғор тизим тезлик ва аниқлик жиҳатидан метеорологик марказларнинг классик услубларини ортда қолдиради, деб ёзади ЎзА.
Аврора модели ақлли таҳлил усули технологияларига асосланган бўлиб, катта ҳажмдаги иқлим маълумотларини юқори тезликда таҳлил қилиш орқали аниқ ва ишончли об-ҳаво башоратларини тақдим эта олади. Модель бир неча дақиқа ичида прогнозлар тузиб, соатлаб давом этадиган анъанавий суперкомпьютер ҳисоб-китобларига муқобил ечим таклиф қилади.
Тизимнинг асосий афзалликлари:
- Реал вақтга яқин тезликда прогнозлаш
- Кўп йиллик метеорологик маълумотлар асосида башоратлар
- Юқори аниқлик даражаси
- Энергия тежамкорлик ва самарадорлик
Аврора модели нафақат кундалик об-ҳаво маълумотлари учун, балки фавқулодда ҳодисаларни эрта аниқлаш, қишлоқ хўжалиги, авиация, ҳамда энергетика соҳаларида ҳам кенг қўлланилиши мумкин.
Microsoft вакилларининг таъкидлашича, бу технология глобал миқёсда иқлим хавфсизлигини таъминлашда муҳим роль ўйнайди. Шунингдек, сунъий интеллект ёрдамида инсоният иқлим ўзгаришларига нисбатан тезроқ ва самаралироқ тайёргарлик кўриши мумкин бўлади.
