Маулен Ашимбаев Валентина Матвиенко билан учрашди
ASTANA. Kazinform – ҚР Парламенти Сенати Раиси Маулен Ашимбаев Қозоғистонга расмий ташриф билан келган Россия Федерацияси Федерал Мажлиси Федерация Кенгаши Раиси Валентина Матвиенко билан учрашди. Бу ҳақда Сенат матбуот хизмати хабар берди.
Учрашувда томонлар бир қатор муҳим масалаларни муҳокама қилиб, 2025-2027 йилларга мўлжалланган парламентлараро ҳамкорликни ривожлантириш бўйича амалий ҳаракатлар режасини имзоладилар.
Маулен Ашимбаев ўз нутқида Валентина Матвиенкони бугун Россияда нишонланаётган Конституция куни билан табриклади. Шунингдек, у Россия парламентаризмининг ҳозирги тарихи 1993 йил 12 декабрдан бошланишини таъкидлаб, ушбу сананинг рамзий маъносига эътибор қаратди. Сенат Раиси кўп қиррали Қозоғистон-Россия муносабатлари барча асосий йўналишларда самарали ривожланиб бораётганини таъкидлади. Бунга, аввало, давлат раҳбарларининг ўзаро муносабатлари хизмат қилаётгани аниқ.
“Россия Қозоғистоннинг асосий сиёсий ва иқтисодий ҳамкори ҳисобланади. Давлат раҳбари Қасим-Жомарт Кемелули Тоқаев таъкидлаганидек, Қозоғистон ва Россия ўртасидаги муносабатлар мустаҳкам ва бузилмас дўстлик намунасидир. Ҳеч шубҳасиз, ҳамкорликнинг барча жабҳаларида ҳамкорлик изчил ва самарали ривожланиб бораётгани ана шундай муносабатларнинг исботидир. Ушбу ташриф ҳам парламентлараро ҳамкорликнинг юқори суръатини сақлаб қолишга хизмат қилади, деб ўйлаймиз. Умуман олганда, давлат раҳбарлари даражасида эришилган барча келишувларнинг самарали бажарилишига таъсир кўрсатиш асосий вазифамиздир”, – деди Сенат Раиси.
Учрашувда Маулен Ашимбаев ва Валентина Матвиенко парламентлараро алоқаларни мустаҳкамлаш истиқболлари ҳамда парламент палаталаридаги тармоқ қўмиталари ва халқаро ташкилотлар ўртасидаги ҳамкорлик масалаларига эътибор қаратдилар. Парламент Сенати ва Федерал Мажлис Федерация Кенгаши ўртасидаги ҳамкорлик бўйича комиссия фаолияти самарадорлиги ҳам муҳокама қилинди.
“Бугун депутатлар ўртасида ўзаро ишончга асосланган мулоқот ва дўстлик шаклланган. Бу мамлакатларимиз ўртасидаги иттифоқ муносабатлари руҳига таянади. Мунтазам ўтказилаётган учрашувларимиз икки давлат ўртасидаги парламентлараро ҳамкорликни тизимли ривожлантириш, умумий вазифаларни тезкорлик билан ҳал этишга хизмат қилмоқда. Сенат ва Федерация Кенгаши ўртасидаги ҳамкорлик бўйича комиссия фаолияти ҳам ўзаро ҳамкорлигимизга тизимлилик бағишламоқда. Ўйлаймизки, 2025-2027 йилларда парламентлараро ҳамкорликни ривожлантириш бўйича амалий ҳаракатлар режасининг имзоланиши келгуси даврга мўлжалланган ўзаро ҳамкорликнинг устувор йўналишларини белгилаш, депутатлар ва аппаратлар фаолиятини аниқлаштириш, парламентлараро ҳамкорликни жонлантиришга янги суръат бағишлайди, – деди Сенат Раиси. Унинг айтишича, МДҲ Парламентлараро Ассамблеяси фаолияти салоҳиятини янада кучайтириш муҳим.
Шу билан бирга, йиғилишда Қозоғистон ва Россия парламентлари депутатларининг савдо-иқтисодий, сармоявий, саноат кооперацияси, туризм, рақамлаштириш ва бошқа устувор йўналишларда келгусидаги ўзаро ҳамкорлигини янада ошириш бўйича вазифалар белгилаб олинди.
Федерация Кенгаши Раиси Валентина Матвиенко Қозоғистонда амалга оширилаётган ижтимоий-иқтисодий ва сиёсий ўзгаришларни юқори баҳолаб, парламентлараро алоқаларни янада жонлантиришнинг истиқболли йўналишларига эътибор қаратди.
“Давлат раҳбарларининг иродаси туфайли мамлакатларимиз ўртасидаги муносабатлар янги муаммоларга қарамай, мисли кўрилмаган юксак даражага кўтарилди. Шу билан бирга, мамлакатларимиз Президентлари томонидан қабул қилинган муҳим қарорлар қонунчилик билан қўллаб-қувватланишини талаб этиши аниқ. Бунда парламентларимиз палаталари ўртасидаги ҳаракатлар режаси ҳақиқий механизм бўла олади. Бу орқали парламент муносабатларини ривожлантириш ва мустаҳкамлашга хизмат қиладиган чора-тадбирларни амалга оширмоқдамиз. Умуман олганда, юқори палаталаримиз ўртасидаги муносабатлар тизимли эканлигини таъкидлаш лозим. Бу йўналишдаги ҳамкорлик икки томонлама асосда ва кўп томонлама майдонларда жадал ривожланмоқда”, – деди Валентина Матвиенко.
Суҳбат чоғида минтақалараро алоқаларни кенгайтириш ҳамкорликдаги ишларнинг устувор йўналишларидан бири сифатида белгиланди.
“Сенат Федерация Кенгаши каби ҳудудлар манфаатларини ҳимоя қилувчи палатадир. Шу боис ҳудудларни изчил ижтимоий-иқтисодий ривожлантириш учун шароит яратиш биз учун жуда муҳим. Жорий йилнинг 27 ноябрь куни Уфа шаҳрида ХХ Ҳудудлараро ҳамкорлик форуми бўлиб ўтди. Тадбирда давлат раҳбарлари видеомулоқот орқали иштирок этдилар. 2024-2028 йилларга мўлжалланган ҳудудлараро ва чегаравий ҳамкорликнинг кенг кўламли дастури қабул қилинди. У 150 га яқин қўшма тадбирлар ва турли лойиҳаларни ўз ичига олади. Дастур ижросини таъминлашда парламент аъзоларининг ҳиссаси алоҳида аҳамиятга эга. Бу йўналишдаги аниқ масалаларни қўшма комиссия доирасида муҳокама қилиш мумкин”, – деди Маулен Ашимбаев.
Учрашувда маданий-гуманитар соҳадаги ҳамкорликни мустаҳкамлаш муҳимлиги таъкидланди. Шу билан бирга, халқаро муносабатлар тизимида фундаментал ўрин тутадиган таълим ва илмий алоқаларни ривожлантириш ҳақида сўз юритилди.
“Келгуси йил таниқли қозоқ шоири Абай Қўнонбоев таваллудининг 180 йиллиги нишонланади. Ушбу юбилей арафасида Қозон шаҳрида мутафаккир бюсти ўрнатилди. “Абай” операси Москвадаги Катта театрда қозоқ тилида саҳналаштирилган. Таълим соҳасидаги ҳамкорлик ҳам фаол ривожланмоқда. Мамлакатларимиз Президентларининг қарори билан Омск шаҳрида Ал-Фаробий номидаги Қозоқ миллий университетининг филиали очилади. Қайд этиш жоизки, бу Қозоғистон олий ўқув юртларининг Россиядаги илк ваколатхонаси бўлади. Яқин келажакда Астанада Л.Гумилев номидаги Евроосиё миллий университети негизида Москва давлат халқаро муносабатлар институти филиалини очиш режалаштирилмоқда”, – деди Қозоғистон Парламенти Сенати Раиси.
Музокаралар якунлари бўйича Сенатда 2025-2027 йилларга мўлжалланган парламентлараро ҳамкорликни ривожлантириш бўйича амалий ҳаракатлар режаси, шунингдек, Қозоғистон Республикаси Парламенти Сенати Аппарати ва Россия Федерацияси Федерал Мажлисининг Федерация Кенгаши Аппарати ўртасида ҳамкорлик тўғрисидаги битим имзоланди.
