Маск Трамп маъмуриятини тарк этади

ASTANA. Kazinform – Миллиардер ва АҚШ Ҳукумат самарадорлиги департаменти (DOGE) раҳбари Илон Маск АҚШ маъмуриятидаги ваколатлари якунланаётганини маълум қилди, деб хабар беради BBC.

Илон Маск Президент Дональд Трампга миннатдорчилик билдирди.

“Махсус давлат хизматчиси сифатидаги муддатим якунига етар экан, исрофгарчиликни камайтириш имкониятини бергани учун президент Дональд Трампга миннатдорчилик билдирмоқчиман”, – деб ёзди у Х ижтимоий тармоқдаги аккаунтида.

"DOGE миссияси вақт ўтиши билан кучаяди, чунки у барча давлат идоралари учун ҳаёт тарзига айланади", – дея қўшимча қилди у.

Маск CBS телеканалига берган интервьюсида Трампнинг "катта, чиройли" солиқ ва бюджет лойиҳасидан ҳафсаласи пир бўлганини айтган эди. Унинг сўзларига кўра, қонун Маскнинг харажатларни қисқартириш ҳаракатларига путур етказади ва бюджет тақчиллигини оширади.

Трамп лавозимга киришгач, Маск “махсус давлат хизматчиси” этиб тайинланди, бу эса унга йилига 130 кун ҳукуматда ишлаш имконини берди. 20 январдаги инаугурациядан бошлаб ҳисобласак, май ойининг охирига қадар 130 кун ўтади. Reuters агентлиги манбаларга таяниб хабар беришича, Маск кетишини эълон қилишдан олдин Трамп билан расман гаплашмаган. Шу билан бирга, уларнинг маълумотларига кўра, қарор "юқори даражада" қабул қилинган.

Апрель ойида Маск ўз компанияларида кўпроқ ишлашни ва ҳафтада бир ёки икки кунни DOGEга бағишлашни режалаштираётганини айтган.