Манзилли ижтимоий ёрдам: уни кимлар олади ва у қандай тайинланади
ASTANА. Кazinform – Қозоғистон Республикаси Меҳнат ва аҳолини ижтимоий ҳимоя қилиш вазирлиги маълумотларига кўра, жорий йилнинг уч ойида 58,8 минг оила (312 минг киши) манзилли ижтимоий ёрдам олди. Шундай қилиб, давлат томонидан қўллаб-қувватланган чора-тадбирлар туфайли жами 58 минг 445 оила қашшоқликдан чиқди.
Ўтган йил натижаларига кўра, Туркистон аҳолисининг кўпчилиги (27 минг оила, 23,7%), иккинчи ўринни 12,7 минг оила билан Чимкент (11,2%), кейинги ўринларни 9,5 минг оила билан Алмати (8,3%), Қизилўрда вилояти 9,4 минг оила (8,2%) эгаллади. Улитау, Атирау ва Шимолий Қозоғистон вилоятларида эса манзилли ижтимоий ёрдам олувчи оилалар сони кам.
Вазирлик маълумотларига кўра, манзилли ижтимоий ёрдам кўпроқ болаларга (65,4%), кейин ишлаётган фуқароларга (15,1%), болалар, қариялар ва ногиронларга қарайдиган шахсларга (12,4%) берилади, қолган 7,1% эса фуқароларнинг бошқа тоифаларига тегишли.
Манзилли ижтимоий ёрдамнинг асосий мақсади кам таъминланган оилаларга моддий ёрдам кўрсатиш ва меҳнатга лаёқатли оила аъзоларини иш билан таъминлашга кўмаклашиш орқали фуқароларни қийин вазиятлардан чиқаришдан иборат.
Манзилли ижтимоий ёрдам қандай ҳолларда тайинланади:
- даромади энг паст ҳудудий яшаш минимумининг 70 фоизидан ошмайдиган фуқароларга ҳар чоракда ижтимоий ёрдам;
- кам таъминланган оилалардаги 1 ёшдан 6 ёшгача бўлган ҳар бир фарзанд учун 1,5 БҲМ миқдорида ойлик қўшимча тўлов;
- иш билан таъминлаш, ўқитиш, ўз бизнесини очиш истагида бўлган оилаларга грантлар ва шу каби ижтимоий ёрдам бериш.
