ҚР Ташқи ишлар вазирлигида Туркий давлатлар ташкилоти билан ҳамкорлик масалалари муҳокама қилинди

ASTANA. Kazinform - Қозоғистон Республикаси Ташқи ишлар вазири ўринбосари Адил Турсунов Астана шаҳрига биринчи амалий ташриф билан келган Туркий давлатлар ташкилотининг (ТДТ) янги тайинланган Бош котиби Кубаничбек Омуралиев билан учрашди, деб хабар беради Kazinform. ҚР Ташқи ишлар вазирлиги матбуот хизматига таяниб.

А.Турсунов Қ.Омуралиевни ТДТ Бош котиби лавозимига тайинланиши билан табриклаб, масъулиятли лавозимида муваффақиятлар тилади ва туркий давлатлар ўртасидаги ташкилот доирасидаги ҳамкорлик янада чуқурлашишига ишонч билдирди.

Учрашувда А.Турсунов Туркий давлатлар ташкилотининг халқаро роли ортиб бораётганини алоҳида таъкидлаб, Қозоғистон туркий дунёнинг ота-боболари диёри бўлганлиги сабабли ташкилотга аъзо барча давлатлар билан ҳар томонлама муносабатларни ривожлантиришдан манфаатдор эканини таъкидлади. Айниқса, мамлакат Қозоғистон ташаббуси билан қабул қилинган «Турк дунёсининг қараши – 2040» ҳужжатини ҳаётга татбиқ этишга катта аҳамият бераётганига алоҳида тўхталди.

Қозоғистон дипломати 2022 йил 11 ноябр куни Самарқанд шаҳрида (Ўзбекистон Республикаси) бўлиб ўтган ТДТ 9-саммитида Президент Қасим-Жомарт Тоқаев томонидан илгари сурилган таклифларнинг муҳимлиги ва долзарблигини таъкидлади ва Қозоғистон томони тизимли ва самарали ишларни кутаётганини таъкидлади.

Қ.Омуралиев ташкилотнинг келгусидаги иш режалари билан ўртоқлашди ва ТДТ котибиятининг аъзо давлатлар билан биргаликда олиб бораётган ишлари ҳақида маълумот берди.

Ишчи ташриф доирасида ТДТ Бош котибининг Президент Қасим-Жомарт Тоқаев, шунингдек, қатор давлат органлари раҳбарлари билан учрашувлари режалаштирилган.

Фото: gov.kz