ҚР Таълим ва фан вазирлиги Алмати шаҳар ҳокимлигига таълим соҳасида қўшимча ваколатлар беради

ALMATY. Кazinform - Қозоғистон Республикаси Таълим ва фан вазирлиги Алмати шаҳри маъмуриятига таълим соҳасида қўшимча ваколатлар беришга қарор қилди. Бу ҳақда Facebookда Қозоғистон Республикаси Таълим ва фан вазири Асхат Аймағамбетов маълум қилди, дея хабар беради Kazinform.

Аввалроқ Давлат раҳбари Алмати шаҳрининг диққатга сазовор масканларидан бири – Ўқувчилар саройида бўлган эди. Болалар билан суҳбатлашди, болалар учун яратилган шарт-шароитлар, Саройдаги модернизация ишларининг оралиқ натижалари билан танишди.

Қозоғистон Республикаси Таълим ва фан вазири Алматида қўшимча таълимни ривожлантириш бўйича ишлар яхши йўлга қўйилганини таъкидлади.

1. Мавжуд Ўқувчилар саройини тўлиқ модернизация қилишдан ташқари, иккита замонавий инновацион ижод маркази фойдаланишга топширилади.

2. Келгуси йилда эски биноларни бузган ҳолда учта ўқувчилар уйи қуриш режалаштирилган. Дизайн ишлари аллақачон олиб борилмоқда.

3. Мактаб спорт майдончаларини реконструкция қилиш ишлари давом эттирилади.

4. Ёш туристлар ва табиатшунослар станциялари янгиланади.

5. Давлат таълим, ижодий ва спорт буюртмалари ҳажми ортади.

«Умуман олганда, тан олиш керакки, ҳозирда Алмати шаҳри маъмурияти бошқа ҳудудларга нисбатан таълим тизимини ривожлантириш бўйича энг яхлит ва изчил сиёсат юритмоқда. Шу боис шаҳар раҳбариятининг соҳани ривожлантириш истиқболлари, мавжуд молиявий имкониятлар ва метрополиянинг кадрлар салоҳиятини ҳисобга олган ҳолда вазирлик Алмати шаҳри ҳокимлигига таълим соҳасида қўшимча ваколатлар беришга қарор қилди.

Бизнинг регламентимизда махсус шартлар ва ваколатларни назарда тутамиз. Бундан ташқари, шаҳардаги таълим ташкилотлари бизнинг асосий инновацион платформамиз бўлади.

Ўз навбатида, ҳокимлик маъмурияти барча янги ташаббусларни молиявий ва ташкилий жиҳатдан қўллаб-қувватлаш мажбуриятини олади. Албатта, вазирлик барча эълон қилинган мажбуриятларнинг бажарилишини назорат қилади», — деди Асхат Аймағамбетов.