ҚР Сенатида Жаҳон банки вице-президенти билан учрашув бўлиб ўтди

NUR-SULTAN. Kazinform – Сенат Раисининг ўринбосари Асқар Шакиров Жаҳон банкининг Европа ва Марказий Осиё бўйича вице-президенти Анна Бьерде билан музокаралар ўтказди, унда Қозоғистон ва ушбу халқаро ташкилот ўртасидаги ҳамкорлик масалалари муҳокама қилинди, дея хабар бермоқда Kazinform ҚР парламенти Сенати матбуот хизматига таяниб.

Вице-спикер Жаҳон банки билан стратегик ҳамкорлик муҳимлигини таъкидлади. Айни пайтда банк кўмагида Қозоғистонда, хусусан, ижтимоий-иқтисодий ва экологик соҳаларда жами 3,5 миллиард долларлик 12 лойиҳа амалга оширилмоқда.

Анна Бьерде банкнинг Қозоғистондаги фаолиятининг асосий йўналишлари сифатида инклюзив ўсишни рағбатлантириш, инсон капиталини мустаҳкамлаш, давлат сектори самарадорлигини ошириш ва мамлакатни институционал ривожлантириш эканлигини таъкидлади. Шу нуқтаи назардан, самарадорликка асосланган бюджетлаштиришни такомиллаштиришда ҳукуматга техник ёрдам кўрсатиш алоҳида қизиқиш уйғотади.

Суҳбатдошлар Глазгодаги иқлим саммити натижаларини, Қозоғистоннинг иссиқхона газлари чиқиндиларини 15 фоизга қисқартириш, 2060 йилгача углерод нейтраллигига эришиш режаларини муҳокама қилдилар. Қозоғистон Республикаси Президенти Қасим-Жомарт Тоқаевнинг мамлакатимизда барқарор ривожланиш учун Марказий Осиё минтақавий иқлим хабини яратиш ташаббуси қўллаб-қувватланди.

Жаҳон банки вице-президенти Қозоғистоннинг чорвачиликни барқарор ривожлантириш дастурини илдам ратификация қилганига қизиқиш билдирди, бу эса иссиқхона газлари чиқиндиларини камайтиришга ёрдам беради. Шу муносабат билан Қозоғистоннинг иқлим ўзгаришига қарши курашдаги етакчилиги таъкидланди.

«Барқарор ривожланиш, жумладан, сув ресурсларидан оқилона фойдаланиш, атроф-муҳитни муҳофаза қилиш масалалари устувордир. Орол фожиаси оқибатларига қарши кураш Марказий Осиё давлатларининг умумий муаммоси бўлиб, уни икки томонлама ва кўп томонлама асосда ҳал этиш зарур», - деди Сенат вице-спикери. Банк кўмагида амалга оширилган экологик лойиҳалар сув сатҳининг кўтарилишига, Орол денгизининг шимолий қисмида балиқчиликнинг тикланишига, умуман, экологик вазиятнинг яхшиланишига хизмат қилди.

Жаҳон банки вакили Қозоғистонга Барқарор ривожланиш мақсадларини амалга оширишда ёрдам беришга ва иқлим ўзгаришига қарши кураш бўйича ташаббусларни илгари суришга тайёрлигини билдирди.