ҚР Президенти Жамбил вилояти ҳокими Ербол Қарашўкеевни қабул қилди
ASTANA. Kazinform – Президентга Жамбил вилоятининг ўтган йилги ижтимоий-иқтисодий ривожланиши тўғрисида маъруза қилинди.
Қасим-Жомарт Тоқаевга ўтган йил якунларига кўра, вилоятнинг асосий макроиқтисодий кўрсаткичларида ижобий динамикани кузатиш мумкинлиги айтилди. Хусусан, асосий капиталга инвестициялар ҳажми 17,3 фоизга ошиб, 517,2 миллиард тенгени ташкил этди. Шунингдек, транспорт тармоғи – 5,2 фоиз, қурилиш – 18,7 фоиз, алоқа – 7,2 фоиз, фойдаланишга топширилган уй-жойлар ҳажми – 4,7 фоизга ошди.
Ербол Қарашўкеевнинг сўзларига кўра, 2023 йилда вилоятда умумий қиймати 75 миллиард тенге бўлган 13 та янги саноат тармоғи ишга туширилади. Жорий йилда умумий қиймати 180 миллиард тенгедан ортиқ бўлган яна 28 та лойиҳани амалга ошириш режалаштирилган. Умуман олганда, инвестиция лойиҳалари пулига умумий қиймати 2,3 триллион тенге бўлган 69 та лойиҳа киритилган. Уларни амалга ошириш орқали 5,5 минг кишини иш билан таъминлаш мумкин.
Президентга кичик ва ўрта бизнес субъектлари томонидан 864,9 миллиард тенгега тенг маҳсулот ишлаб чиқилгани маълум қилинди. Бу соҳада банд бўлганлар сони 18,5 фоизга ошди.
Бундан ташқари, Қасим-Жомарт Тоқаевга вилоятда агросаноат мажмуасини ривожлантириш ҳақида сўзлаб берилди. Вилоятда сув хўжалиги объектларини қуриш ва модернизация қилиш ишлари давом эттирилмоқда. “Қишлоқ омонати” дастури доирасида жорий йилда сувни тежаш ва балиқчиликни ривожлантириш лойиҳаларига қўшимча маблағлар ажратилади.
Вилоят ҳокимининг таъкидлашича, ўтган йили 2030 ўринли 7 мактаб фойдаланишга топширилган. Жорий йилда 13 минг 380 ўринли 29 та таълим объекти қурилиши бошланади. Улар орасида 12 та таълим муассасаси “Қулай мактаб” миллий лойиҳаси доирасида қурилади.
Шунингдек, 19 та соғлиқни сақлаш муассасаси, жумладан, Тараз шаҳридаги вилоят онкология диспансери, Шу туманида болалар реабилитация маркази фойдаланишга топширилди.
Йиғилиш якунида Қасим-Жомарт Тоқаев Жамбил вилояти ҳокимига вилоятни ижтимоий-иқтисодий жиҳатдан янада ривожлантириш ва аҳоли даромадларини оширишга қаратилган қатор топшириқлар берди.
