ҚР Президенти Германия Бундесрати Президенти Анке Релингер билан учрашди
ASTANA. Kazinform – Қасим-Жомарт Тоқаев Ақордада Германия Федератив Республикаси Бундесрати Президенти, Саар бош вазири Анке Релингер билан учрашди.
ҚР Президенти Германияни Қозоғистоннинг Европа Иттифоқидаги асосий стратегик ҳамкори деб атади ва бу давлат иқтисодиётининг етакчи инвесторларидан бири эканини таъкидлади.
“Германия биз учун муҳим давлат, Европадаги асосий ҳамкоримиз. Биз давлатингиз билан ҳамкорликка катта аҳамият берамиз. Фурсатдан фойдаланиб, Германияга сафарим ҳақидаги фикрларим билан ўртоқлашмоқчиман. Мен узоқ вақтдан бери яхши билган жаноб Штайнмайер билан музокаралар олиб бордим. Парламентлараро алоқаларга келсак, мен интеграциянинг ушбу йўналишини қўллаб-қувватлайман”, – деди Қозоғистон Президенти.
Давлат раҳбари мартабали меҳмонга мамлакат иқтисодий сиёсатининг устувор йўналишлари ҳақида сўзлаб берди.
«Бизнинг фикримизча, энди асосий эътиборни йирик инфратузилма лойиҳалари, рақамлаштириш ва сунъий интеллектни ривожлантиришга қаратиш керак. Шунингдек, транспорт-логистика ва қишлоқ хўжалиги соҳаларини ривожлантириш зарур”, – деди Қасим-Жомарт Тоқаев.
Президент Қозоғистонда сўнгги йилларда кенг кўламли сиёсий ислоҳотлар амалга оширилганини таъкидлади.
«Қонунчиликка, биринчи навбатда, Конституцияга киритилган ўзгартиришлар Қозоғистоннинг тубдан модернизация йўлига ўтганидан далолат беради. Албатта, ислоҳотлар давом этмоқда. Ҳуқуқни муҳофаза қилиш ва суд тизимига ҳам ўзгартиришлар киритилиши мумкин. Бу жуда муҳим. Лекин давлат тузилиши, мен бу ерда президентлик бошқарув тизими ҳақида гапиряпман, қандай бўлса, шундай бўлиб қолади. Чунки ҳозиргидек ўзгаришлар даврида давлатнинг табиати шундай бўлиши керак. Бу бизнинг тушунчамизга тўғри келади», – деди Давлат раҳбари.
Анке Релингер Қасим-Жомарт Токаевга учрашиш имконияти учун миннатдорчилик билдирди ва икки давлат манфаати йўлида умумий мақсадларни илгари суришга тайёрлигини билдирди.
«Фикр алмашиш учун вақт ажратганингиз учун катта раҳмат. Федерал Президент Штайнмайерга самимий саломингизни етказаман. У Қозоғистон ва Марказий Осиёнинг ҳақиқий дўсти. Қозоғистон ўрта давлат сифатида бу минтақадаги асосий ҳамкоримиздир”, – деди Германия Бундесрати Президенти.
Учрашувда Қозоғистон ва Германия ўртасидаги савдо-иқтисодий, сармоявий ва маданий-гуманитар ҳамкорликни мустаҳкамлаш масалалари муҳокама қилинди.
