ҚР Президенти Евроосиё тараққиёт банки бошқаруви раиси Николай Подгузовни қабул қилди
ASTANA. Kazinform – Давлат раҳбарига банк фаолияти якунлари ва келгуси даврга мўлжалланган режалар ҳақида маълумот берилди. Николай Подгузовнинг айтишича, Евроосиё тараққиёт банкининг Қозоғистон иқтисодиётига йиллик сармояси икки йил кетма-кет 1 миллиард доллардан ошган.
Қасим-Жомарт Тоқаевга маълум қилинишича, банкнинг 2022-2023 йилларда йиллик сармоясининг умумий ҳажми 4,2 миллиард долларни ташкил қилади. Бу Стратегияда белгиланган 2022-2026 йилларга мўлжалланган режадан қарийб 1,5 баробар кўпдир. Ўтган йил якунларига кўра, бу кўрсаткич 59 фоизни ташкил этган.
Президентга тақдим этилган маълумотларга кўра, банк 2024 йил учун Қозоғистондаги потенциал лойиҳаларга йўналтириш учун кўриб чиқаётган маблағ миқдори 3,5 миллиард доллардан ошади. Бунда, биринчи навбатда, транспорт инфратузилмаси, иссиқлик энергияси, қайта тикланувчи энергия манбалари, саноат, агросаноат ва сув ресурслари каби стратегик муҳим соҳаларга сармоя киритиш режалаштирилган.
Николай Подгузовнинг сўзларига кўра, жорий йилда банк Қозоғистон молия бозорини ривожлантириш ва инфратузилма лойиҳаларини молиялаштиришнинг янги воситаларини жорий этишда иштирок этиш ниятида.
Шу билан бирга, Евроосиё тараққиёт банки раиси Давлат раҳбарига Марказий Осиёнинг сув-энергетика соҳаси бўйича олиб борилган тадқиқотлар натижаларини тақдим этди. Банк Қозоғистоннинг сув ресурсларидан самарали фойдаланувчи давлатлар етакчиси сифатида шаклланишига ҳисса қўшиш ниятида. Шунингдек, сувни тежовчи ва энергия тежамкор технологиялар бўйича ҳудудий экспертиза марказларини ривожлантириш учун 10 миллион долларгача грант ажратишга тайёр. Шунингдек, сув ҳисобининг рақамли технологияларини жорий этиш, суғориладиган ерларни тўлиқ лазер асосида режалаштириш, замонавий суғориш ускуналарини ишлаб чиқарувчи ҳудудий ишлаб чиқариш-хизмат кластерини яратишга қаратилган лойиҳаларга 400 миллион долларгача маблағ йўналтирилади.
Давлат раҳбари шу йилнинг ёзида Алмати шаҳрида Евроосиё тараққиёт банкининг йиллик якуний йиғилиши ва бизнес-форумини ташкил этиш масаласини олқишлашини айтди. Мазкур форумнинг кун тартибидан Марказий Осиё сув-энергетика комплекси, транспорт тизимининг тузилиши ва молиявий воситаларни ривожлантиришга оид масалалар ўрин олган. Бундан ташқари, Қасим-Жомарт Тоқаев мамлакатда банк томонидан қўллаб-қувватланаётган инфратузилма лойиҳалари муҳим аҳамиятга эга эканини таъкидлади.
