ҚР Мажилиси Семей ядровий хавфсизлик зонаси тўғрисидаги қонун лойиҳасини маъқуллади
«2008 йилдан буён Миллий ядровий марказ томонидан полигон 100 фоиз кўздан кечирилди, 2 миллиондан ортиқ текширувлар амалга оширилди ва 5 мингга яқин тупроқ намуналари таҳлил қилинди. Жорий йилда текширув материаллари давлат экологик экспертизасига юборилади, шундан сўнг полигон чегаралари аниқланади. Уларнинг тахминий майдони мос равишда 8900 км2 ва 9400 км2 ни ташкил қилади. Аввал айтиб ўтганимиздек, ифлосланган ерларни самарали бошқариш мақсадида улар ҳудудида Семей ядровий хавфсизлик зонасини ташкил этиш таклиф этилмоқда», — деди Энергетика вазири Болат Ақшолақов.
Унга кўра, қонун лойиҳасида ваколатли органга ташкил этиладиган зона ҳудудида ядро қуроли тарқалмаслигини таъминлаш, радиоактив ифлосланишни тиклаш ва камайтириш, тарихий радиоактив чиқиндиларни бошқариш ва радиоактив ифлосланиш мониторинги функцияларини тақдим этиш таклиф этилган.
Ядровий хавфсизлик зонаси доирасида қонун лойиҳасида назарда тутилмаган фаолиятни тақиқлаш жорий этилади.
Бу ихтисослаштирилган ҳудуддан ташқарида радиоактив чиқиндилар тарқалишининг ва аҳолига радиация тушишининг олдини олади.
Ялпи мажлисда «Семей ядровий хавфсизлик зонаси тўғрисида Қозоғистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси ҳам биринчи ўқишда маъқулланди.
«Асосий қонун лойиҳаси ижросини таъминлаш мақсадида илова қилинган қонун лойиҳасида Ер ва Экология кодексларига ўзгартишлар киритиш назарда тутилган. Хусусан, Ер кодексининг «Саноат, транспорт, алоқа, космик, мудофаа, миллий хавфсизлик ва бошқа қишлоқ хўжалигига мўлжалланмаган ерлар» тоифасига «ядровий хавфсизлик зонаси ерлари» қўшилди. Бундан ташқари, қонун лойиҳасида зарур ҳуқуқий тартиб-таомилларни тасдиқлаш учун заҳираларни «ядровий хавфсизлик зонаси»га ўтказиш тартибини ишлаб чиқиш ва тасдиқлаш кўзда тутилган. Шунингдек, ядровий хавфсизлик зонаси ерларини Семей ядровий хавфсизлик зонаси фаолияти бўйича ваколатли ташкилотнинг ердан фойдаланишига бериш ҳам мумкин», - деди вазир.
Муаллиф: Руслан Ғаббасов
