Қозоғистоннинг Ўмон давлатига ҳурмати ўзгача — Қасим-Жомарт Тоқаев
ASTANА. Кazinform - Давлат раҳбари Ўмон Ташқи ишлар вазири Бадр ал-Бусайдийни қабул қилди.
Қасим-Жомарт Тоқаев Бадр ал-Бусайдийга ҳурмат кўрсатар экан, Ўмонни Қозоғистоннинг ишончли ва вақт синовларидан ўтган ҳамкори деб атади. Шунингдек, у икки давлат ўртасидаги ҳамкорликни янада ривожлантиришга қатъий қарор қилганини таъкидлади.
Президентнинг сўзларига кўра, Қозоғистон ва Ўмон икки томонлама, шунингдек, минтақавий ва халқаро кун тартибидаги ўзаро ҳамкорликни ривожлантириши мумкин. У катта салоҳиятга эга.
Давлат раҳбари фурсатдан фойдаланиб, Ўмон султони Ҳайсам бин Тариқга салом йўллаб, уни мамлакатга ташриф буюришга таклиф қилди.
– Қозоғистоннинг Ўмон давлатига ҳурмати ўзгача. Юртингизга фуқароларимиз, жумладан, ишбилармонлар, маданият арбоблари катта қизиқиш билдирмоқда. Шу боис ҳамкорлигимиз кенг қамровли ва муваффақиятли бўлиши учун унга янги туртки бериш зарур, – деди Қасим-Жомарт Тоқаев.
Ўмон ташқи сиёсат идораси раҳбари Давлат раҳбарига меҳмондўстлиги учун миннатдорчилик билдириб, бу икки давлат ўртасидаги ўзаро ҳурмат юксак даражада эканини кўрсатишини таъкидлади.
– Биз Қозоғистон тараққиётига катта қизиқиш билан қараймиз. Мамлакатингиз ва халқингиз фаровонлиги йўлида амалга ошираётган кенг кўламли ислоҳотлар бизни ҳайратда қолдирди. Қозоғистон иқтисодиётининг ўсиш суръатлари, мамлакатингизнинг ушбу минтақада тинчлик ва хавфсизликни сақлашда дўстона қўшничилик алоқаларини мустаҳкамлашдаги асосий ўрни ва таъсири ҳайратланарли. Адолат ва умуминсоний тинчлик, хавфсизлик ва фаровонликка қаратилган ташқи сиёсатдаги позициянгизни юксак қадрлаймиз, — деди дипломат.
Учрашувда транспорт-логистика, қишлоқ хўжалиги, маданий-гуманитар ва рақамлаштириш соҳаларидаги ҳамкорлик истиқболлари кўриб чиқилди. Икки давлат ўртасида тўғридан-тўғри ҳаво алоқаларини очиш масаласи ҳам муҳокама қилинди.
Бундан ташқари, Қасим-Жомарт Тоқаев ва Бадр ал-Бусайдий минтақавий хавфсизлик ва кўп томонлама ташкилотлар доирасидаги ҳамкорликка оид долзарб масалалар юзасидан фикр алмашди.
