Қозоғистоннинг қайси вилоятларида нодир металлар топилган
ASTANA. Kazinform — Қозоғистонда ноёб ер металлари заҳиралари бўлган 10 та объектда қидирув ишлари якунланди.
ҚР Саноат ва қурилиш вазирлиги Геология қўмитаси раиси Ерлан Ақбаров мазкур ҳудудларда геология-қидирув ишлари билан қайси компаниялар шуғулланаётгани ҳақида маълумот берди.
“Ҳукумат топшириғига асосан ер қаърини давлат геологик ўрганиш доирасида 12 та жойда иш олиб бордик. Улардан 10 тасида қидирув ишлари якунланди. Биз аниқлаган энг катта ҳудуд - Қуйректикўл участкаси бўлиб, у ерда 20 миллион тоннага яқин нодир металларнинг ишлаб чиқариш заҳиралари мавжуд”, — деди Ерлан Ақбаров Ҳукуматдаги брифингда.
Тантал ва ниобий каби нодир металлар бошқа ҳудудларда ҳам топилган ва қайд этилган. Аниқроғи, Жанубий Қозоғистонда 3 та, Шарқий Қозоғистон вилоятида 2 та, Шимолий Қозоғистонда 3 та объект мавжуд.
“Қидирув ва баҳолаш ишларини якунладик. Энди разведка ўтказиш керак. Кейинчалик бу ишларга реал инвесторлар жалб этилади. Айни пайтда ушбу участкаларни “Тау-Кен Самруқ” компаниясига бериш масаласи кўриб чиқиляпти. Бу ечимлардан бири”, - деб таъкидлади қўмита раҳбари.
Маърузачи, шунингдек, Корея геология институти (KIGAM) билан ҳамкорликда Шарқий Қозоғистон вилоятида литий конлари аниқланганини айтди. Ҳозирда геология-разведка ишларини олиб бориш бўйича музокаралар олиб бориляпти.
“Унда литий ва унга алоқадор нодир металлар заҳиралари мавжуд. Жамғарма бор жойда бизнинг улушимиз бўлади. “Тау-Кен Самруқ”нинг ҳам маълум улуши бўлиши мумкин”, – деди Ерлан Ақбаров.
Шунингдек, аввалроқ Канада компанияси Қозоғистонда геологик қидирув ишларини олиб бориш учун лицензия олгани ҳақида хабар берилган эди.
“Канада компанияси “биринчи” келганда, биринчи навбатда, қидирув ишларини олиб бориш учун лицензия олди. Қозоғистон томонининг бунда ҳеч қандай улуши йўқ. Улар ўзлари қидирув ишларини олиб борадилар ва рудани ўзлари қазиб оладилар”, — дея қўшимча қилди қўмита раиси.
Қайд этиш жоизки, Қозоғистон ноёб ер элементлари бўйича дунёнинг кучли ўнталигига кириши мумкин.
