Қозоғистоннинг бир қатор ҳудудларида архив омборлари қурилади
ASTANA. Kazinform – Қозоғистоннинг бир қатор ҳудудларида архив омборлари қурилади. Бу ҳақда ҚР Бош вазир Олжас Бектеновнинг Сенат депутатлари саволига берган жавобида айтилди.
“Бугунги кунда архивларда илмий-тадқиқот ва кўргазма мақсадларида тақдим этилаётган ҳужжатларни рақамлаштиришга устувор аҳамият берилмоқда. 2024 йилда рақамлаштирилган ҳужжатлар улуши 10,8 фоизни (579 011 сақлаш бирлиги) ташкил этади. Жами 2 654 404 та сақлаш бирлиги рақамлаштирилди. Архив соҳасини молиялаштириш кўпайтирилиб, ҳужжатларни рақамлаштириш ва сақлаш фондини яратиш учун 1000 дан ортиқ янги жиҳозлар, компьютерлар ва бошқа ташкилий жиҳозлар харид қилинди”, - деди Ҳукумат раҳбари ўз жавобида.
Бош вазир, Давлат раҳбарининг ҳудудларда архив бинолари қуриш зарурлиги тўғрисидаги топшириғи ижроси доирасида 2025 йилда марказий давлат архивининг 700 минг сақлаш бирлигига мўлжалланган архив омбори қуриш бўйича давлат экспертизасининг ижобий хулосаси олинганини таъкидлади. 4 та туман архиви (Манғистау вилояти Жанаўзен туман архиви, Жамбил вилояти Қордай ва Жамбил туман архивлари, Ақтўбе вилояти Темир туман архиви) фойдаланишга топширилди.
“Шарқий Қозоғистон вилояти, Туркистон, Қарағанди, Алмати, Жамбил вилоятлари ва бошқа вилоятларда ер участкалари ажратилди. Жамбил вилояти архиви қурилишининг лойиҳа-смета ҳужжатлари ишлаб чиқилмоқда, ер участкалари ажратилган 5 та ҳудудий архивда муҳандислик коммуникацияларини амалга ошириш учун техник шартлар ишлаб чиқилмоқда”, – деди у.
Олжас Бектеновнинг маълум қилишича, Қизилўрда вилоятида 3 та туман архиви “Рухоният” маданият марказлари биноларига кўчирилган, 4 та туман архивини кўчириш режалаштирилган.
"Шунингдек, “Қурилиш лойиҳалари давлат банки” маълумотлар базасида ҳудудларда архив биноларини қуришда кўп марталик фойдаланиш учун “Тайёр қурилиш объектлари реестри”да 200 минг ва 500 минг сақлаш бирликлари учун намунавий лойиҳа-смета ҳужжатлари мавжуд. Ақтўбе ва Атирау вилоятлари архивлари учун 1 миллион дона, Жамбил вилояти архивлари учун эса 1,5 миллион доналик лойиҳа-смета ҳужжатлари давлат экспертизасидан ўтказилмоқда. У қайта фойдаланиш учун реестрга киритилади. Бу борадаги ишлар давом этмоқда”, - деди Бош вазир.
