Қозоғистонга кўпроқ қайси давлатлардан пул юборилади
ASTANA. Kazinform – 2025 йил май ойида халқаро пул ўтказмалари тизими орқали Буюк Британиядан Қозоғистонга 3,6 миллиард тенге миқдорида пул ўтказилган. Бу ҳақда Data Hub хабар берди.
Қозоғистонлик таҳлилчиларнинг қайд этишича, 2017 йилдан бери биринчи марта Буюк Британиядан келган пул миқдори эътиборли даражага етиб, мамлакат Миллий банк статистикасида алоҳида сатр билан кўрсатилган ва пул юборувчи давлатлар рўйхатида топ-10ликка кирган.
«Халқаро пул ўтказмалари тизимлари орқали Қозоғистонга юборилган жами пулларнинг 19 фоизи айнан Буюк Британия ҳиссасига тўғри келган. Давлатлар кесимидаги умумий рейтингда Британия Россиядан кейин иккинчи ўринни эгаллади. Россиядан май ойида 4,6 миллиард тенге, учинчи ўринда эса 2 миллиард тенгедан ортиқ пул билан Ўзбекистон жой олди», – дейилади экспертлар хулосасида.
Шунингдек, таҳлилчилар Британиядан келган пул миқдори жуда кўп сонли трансакциялар ҳисобига шаклланганини таъкидлашди – 9,9 минг операция. Бу кўрсаткич бўйича ҳам мамлакат иккинчи ўринда турибди. Биринчисида – Россия (16,5 минг операция), учинчи ўринда – Германия (4,7 минг операция).
