Қозоғистонга энг кўп фуқаролари ташриф буюрадиган 5 та давлат

ASTANA. Kazinform – 2024 йилда Қозоғистонга 15,3 миллион чет эл фуқароси туризм мақсадида келган. Бу ҳақда Туризм саноати қўмитасининг Kazinform агентлиги сўровига жавобида маълум қилинди.

Сайёҳларнинг умумий сонидан 10,4 миллион киши мамлакатда бир кундан ортиқ вақт ўтказган ва ўртача қолиш муддати тўрт кунни ташкил этган.

Сайёҳлар сони бўйича МДҲдан ташқаридаги ТОП-5 та давлатга қуйидагилар киради: Хитой, Ҳиндистон, Туркия, Германия ва Жанубий Корея.

Хитойдан Қозоғистонга 655 минг фуқаро ташриф буюрди. Оқимнинг сезиларли даражада ошиши визасиз режимнинг жорий этилиши ва ҳаво қатновининг кенгайиши билан боғлиқ, дея тушунтирди қўмита.

Ҳиндистондан — 146 минг сайёҳ. Қозоғистонга қизиқиш тўғридан-тўғри рейслар, соддалаштирилган виза режими ва сайёҳлик йўналишларини ривожлантириш орқали қўллаб-қувватланади.

Туркиядан — 130 минг турист. Қозоғистонни танлашга мунтазам ҳаво қатнови, шунингдек, мамлакатлар ўртасидаги барқарор маданий ва ишбилармонлик алоқалари таъсир кўрсатади.

Германиядан — 92 минг киши. Германиядан келган сайёҳларни этнотуризм, табиий диққатга сазовор жойлар, ҳамда тарихий ва маданий мерос ўзига жалб қилади.

Жанубий Кореядан — 40 минг турист. Туристлар оқими барқарор ўсиб боряпти. Асосий омиллар орасида тўғридан-тўғри рейсларнинг мавжудлиги, соддалаштирилган виза режими, шунингдек, Қозоғистон табиати, миллий таомлари ва маданиятига қизиқиш киради.

Туризм вазирлиги маълумотларига кўра, ташқи туризми ўсишда давом этмоқда. Агар 2014 йилда расмий турар жойларга келган хорижлик сайёҳлар сони 679 минг кишини ташкил этган бўлса, 2024 йилда бу кўрсаткич 1,3 миллион кишига етди. Бу ўн йил ичида 190% га ўсишдир.

Ижобий динамика Қозоғистон халқаро саёҳатчилар учун жозибадор манзилга айланиб бораётганидан далолат беради.