Қозоғистонда яшил энергия лойиҳалари кўпаймоқда
ASTANA. Kazinform - Қозоғистондаги Бирлашган Миллатлар Ташкилотининг Тараққиёт дастури қайта тикланувчи энергия технологияларига сармоя киритиш хавфини камайтириш бўйича лойиҳа натижаларини тақдим этди.
Эслатиб ўтамиз, ҚР Энергетика вазирлиги БМТТД ва Глобал экологик жамғарманинг молиявий кўмагида муҳим лойиҳани амалга оширди.
Маълумки, 2060 йилгача муқобил ва қайта тикланадиган энергия манбаларига ўтиш муносабати билан Қозоғистоннинг углерод нейтраллигига эришиш лойиҳаси нафақат энергетика соҳасидаги йирик объектларни, балки кичик ва ўрта бизнес объектларини ҳам қамраб олади.
Бугунги кунда Қозоғистонда Глобал экологик жамғарманинг молиявий кўмагида умумий қуввати 2900 МВт бўлган 148 та йирик объект фаолият кўрсатмоқда. Электр энергияси ишлаб чиқаришнинг умумий ҳажмида қайта тикланадиган манбалар улуши 6,5 фоизга етди.
“Иқтисодиётни декарбонизация қилиш - бизнинг асосий вазифамиз бўлиб, бу ёш авлод олдидаги масъулиятимизни кўрсатади. Қазиб олинадиган ёқилғидан босқичма-босқич воз кечиш ва қайта тикланадиган энергия манбаларига ўтиш энди улуғвор мақсад эмас, балки бутун дунё мамлакатлари томонидан қабул қилинган мажбуриятдир. БМТТДнинг ёндашуви ҳукуматларга қонунчиликни такомиллаштириш орқали қайта тикланадиган энергияга хусусий сармояларни самарали рағбатлантириш ва тарқатишда ёрдам беради. “Яшил” ташаббусларни қўллаб-қувватлаш орқали биз одамлар ва сайёрамиз учун кам углеродли келажакка ишонч билан қадам қўямиз”, - деди БМТТДнинг Қозоғистондаги доимий вакили Катаржина Вавьерния махсус ташкил этилган учрашувда.
ҚР Энергетика вазири ўринбосари Сунғат Есимханов вазирлик томонидан мамлакат энергетика балансида қайта тикланадиган энергия манбаларининг улушини ошириш бўйича фаол ишлар олиб борилаётганини таъкидлади.
“Бу йўналишдаги лойиҳалар Қозоғистонга нафақат иссиқхона газлари чиқиндиларини камайтириш, балки энергия хавфсизлигини мустаҳкамлаш имконини беради. Электр энергетикасини ривожлантириш бўйича чора-тадбирлар режасини муваффақиятли амалга ошириш жараёнида 2035 йилга келиб ёқилғи турлари бўйича белгиланган қувватлар таркиби қуйидагича бўлади: қайта тикланадиган энергия манбалари – 24,4 фоиз; гидроэлектростанция - 10,8 фоиз; газ - 25,8 фоиз; кўмир – 34,3 фоизни ташкил этади”, — деди у.
Муаллиф: Оралхан Қожанов
