Қозоғистонда сувни тежайдиган технологиялар ишлаб чиқарадиган заводлар сони еттитага етди
ASTANА. Кazinform — Қозоғистонда сувни тежайдиган ускуналар ишлаб чиқарадиган маҳаллий заводлар сони 2024 йилдаги тўрттадан еттитагача кўпайди. Бу йил яна 158 минг гектар майдонга замонавий суғориш тизимлари жорий этилди. Натижада уларнинг умумий майдони 702,3 минг гектарга етди. Бу ҳақда Сув ресурслари ва ирригация вазирлиги хабар берди.
Вазирлик маълумотларига кўра, Қозоғистонда фермерларнинг сувни тежайдиган ускуналарга бўлган эҳтиёжини қондириш учун пуркагичли суғориш машиналари ва томчилатиб суғориш ускуналарини ишлаб чиқарадиган еттита маҳаллий завод фаолият юритмоқда. Улардан учтаси Туркистон вилоятида, иккитаси Астанада ва биттадан Атирау вилояти ва Алматида жойлашган. 2025 йилда мамлакатда бешта завод, 2024 йилда эса тўртта завод фаолият юритган.
Мавжуд корхоналарнинг умумий ишлаб чиқариш қуввати йилига 3390 та пуркагичли суғориш машинаси ишлаб чиқариш учун етарли бўлади. Бу тахминан 205 минг гектар ерни суғориш имконини беради. Жорий маълумотларга кўра, бу йил қишлоқ хўжалиги ишлаб чиқарувчилари жами 82,5 минг гектар ерни суғориш учун мўлжалланган 1010 тага яқин пуркагичли суғориш машиналарини сотиб олишди.
Бундан ташқари, хорижий инвестицияларни жалб қилиш бўйича фаол ишлар олиб борилмоқда. Масалан, Қостанай вилоятида Америка пуркагичли суғориш машиналарини маҳаллий ишлаб чиқариш лойиҳаси бошланди. Шунга ўхшаш лойиҳа Қарағанди вилоятида ҳам амалга оширилмоқда.
— Жорий йил бошидан бери қўшимча 158 минг гектар суғориладиган ерларда сувни тежайдиган технологиялар жорий этилди. Натижада замонавий суғориш тизимларидан фойдаланиладиган ерларнинг умумий майдони тахминан 702,3 минг гектарга етди. Суғориш сувини субсидиялаш қоидаларига ҳам ўзгартиришлар киритилди. Хусусан, субсидияланган сувни тежайдиган технологиялар рўйхатига лазерли текислагич қўшилди, — деди Сув ресурслари ва ирригация вазири ўринбосари Талғат Момишев.
Таъкидлаш жоизки, Сув ресурслари ва ирригация вазирлиги қишлоқ хўжалиги ишлаб чиқарувчиларининг сувни тежайдиган тизимларни сотиб олиш ва ўрнатиш харажатларини қоплашни 50% дан 80% гача оширди. Бундай тизимлардан фойдаланишда эса суғориш суви учун субсидия миқдори 85% гача оширилди.
Эслатиб ўтамиз, Қозоғистон сув ресурсларини қандай сақлаб қолиши ҳақида хабар берган эдик.
