Қозоғистонда машинасозлик соҳасида ишлаб чиқариш ҳажми 2028 йилга бориб 4,5 баробар ортади

ASTANA. Kazinform - Астана шаҳрида бўлиб ўтаётган Қозоғистон машинасозлик муҳандисларининг XII форумида 20 мамлакатдан 1500 дан ортиқ иштирокчи иштирок этмоқда. Австрия, Бразилия, Германия, Италия, Хитой, Туркия, Россия ва бошқа мамлакатлар вакиллари икки кун давомида соҳанинг долзарб масалалари, Қозоғистон машинасозлик истиқболлари ва янги ўсиш нуқталарини муҳокама қилади, деб хабар беради Kazinform.

Қозоғистон машинасозлик муҳандислари уюшмаси бошқаруви раиси Мейрам Пшембаевнинг маълум қилишича, Давлат раҳбари топшириғига биноан 2024-2028 йилларга мўлжалланган машинасозликни ривожлантиришнинг комплекс режаси ишлаб чиқилган.

Ҳужжатга кўра, ишлаб чиқариш ҳажми 4,5 баробар, экспорт ҳажми 3 баробар, меҳнат унумдорлиги 2 баробар, инвестициялар ҳажми 1,5 баробар ошиши керак.

Машинасозликни ривожлантириш Давлат раҳбарининг шахсий назоратида экани таъкидланди. “Саноат сиёсати тўғрисида”ги қонун қабул қилинди ва Саноатни ривожлантириш жамғармаси тузилди. 2023 йилда Ҳукумат Машинасозлик муҳандислари уюшмаси томонидан таклиф қилинган бир қатор ташаббусларни қўллаб-қувватлади.

Пшембаевнинг фикрича, геосиёсий муаммолар фонида ички ишлаб чиқариш занжирларини ривожлантириш, экспорт йўналишлари ва жаҳон бозорлари талабларига мослашиш алоҳида аҳамиятга эга.

Бугунги кунда Қозоғистон иқтисодиётида юқори технологияли қайта ишлаш саноатининг кескин ўсиши кузатиляпти. Унинг ялпи ички маҳсулотдаги улуши биринчи марта тоғ-кон саноатидан 4,6 фоизга ошди. Шу билан бирга, ишлаб чиқариш саноати таркибида машинасозликнинг улуши 20 фоизга етди.

Шунингдек, мамлакат президенти 2029 йилга бориб иқтисодиёт ҳажмини икки бараварга ошириш ва 450 миллиард долларга етказиш, ишлаб чиқариш саноатида меҳнат унумдорлигини 1,5 баробар ошириш вазифасини ҳам қўйди.

Эслатиб ўтамиз, аввалроқ Қозоғистон машинасозларининг XII форуми очилишида Бош вазир Олжас Бектенов сўзга чиқди.