Қозоғистонда кузги йиғим-терим учун 423 минг тонна дизел ажратилди

NUR-SULTAN. Kazinform – Қозоғистон қишлоқ хўжалиги ишлаб чиқарувчиларига кузги йиғим-терим мавсуми учун 423 минг тоннадан ортиқ дизел ёқилғиси ажратилди, шундан 83 минг тоннаси Ақмола вилояти ҳиссасига тўғри келади. Бу ҳақда Ақмола вилоятига амалий ташрифи чоғида аҳоли билан учрашган ҚР Энергетика вазири Болат Ақшолақов маълум қилди, дея хабар бермоқда Kazinform.

Вазирнинг сўзларига кўра, айни пайтда қишлоқ хўжалиги маҳсулотлари ишлаб чиқарувчиларга дизел ёқилғисини юклаш ва жўнатиш ишлари белгиланган жадвал асосида олиб борилади.

«Бугунги кунда кузги йиғим-теримни ўз вақтида ва мунтазам ўтказиш мақсадида мамлакатдаги қишлоқ хўжалиги маҳсулотлари ишлаб чиқарувчиларга нефтни қайта ишлаш заводларида тоннасига 222 минг тенге қийматида 423 минг тоннадан ортиқ дизел ёқилғиси ажратилди»

, — деди Болат Ақшолақов.

Бундан ташқари, вазир қишлоқ хўжалиги ишлаб чиқарувчиларини дизел ёқилғиси билан таъминлаш бозорини ислоҳ қилиш, экин майдонларининг умумий майдони, ёқилғи-мойлаш материалларига бўлган эҳтиёжни кўрсатувчи, ҳудудий бўлинмада қишлоқ хўжалиги маҳсулотлари ишлаб чиқарувчилар маълумотлар базасини яратиш бўйича алоқа маълумотларини, ёқилғи тақсимоти бўйича электрон ахборот тизимини жорий этиш каби қатор чора-тадбирлар кўрилаётганини таъкидлади. Бу, ўз навбатида, қишлоқ хўжалиги маҳсулотлари ишлаб чиқарувчиларга нефт базалари ёки ресурс эгаларидан мустақил равишда нефт маҳсулотларини сотиб олиш имконини беради.