Қозоғистонда илк бор микромолиявий омбудсман институти жорий этилади
У ўз фаолиятини 2024 йил 21 декабрда бошлайди, дея хабар беради Кazinform.
Молия бозорини тартибга солиш ва ривожлантириш агентлигининг хабар беришича, унинг асосий мақсади фуқаролар ҳуқуқлари ҳимоясини таъминлаш ва низоларни судгача ҳал этишга кўмаклашишдан иборат. Микромолия омбудсмани қозоғистонликларнинг микрокредитлар билан боғлиқ низоларини, шу жумладан муддати ўтган қарзларни ва коллектор агентликлари билан низоларни ҳал қилиш масалаларини кўриб чиқади.
Омбудсмандан фақат микромолия ташкилотлари (ММТ) мижозлари - жисмоний шахслар ёрдам сўрашлари мумкин. Унинг хизматлари бепул. У мустақил арбитр сифатида иш олиб боради, низоларни судга мурожаат қилмасдан ҳал қилишга ёрдам беради.
Омбудсманнинг қарори, агар қарз олувчи томонидан қабул қилинган бўлса, микромолия ташкилоти учун мажбурийдир ва агар томонлар бошқа муддатга келишиб олмаса, 30 кун ичида амалга оширилиши керак.
Микромолиявий омбудсманнинг ваколатига судга юборилган ёки қонуний кучга кирган суд қарорлари мавжуд бўлган ишлар кирмайди. Шунингдек, у исботланмаган ҳолатлар ёки ишда янги ҳолатлар мавжуд бўлмаганда қайта-қайта берилган мурожаатларни кўриб чиқмайди.
Микромолиявий омбудсманнинг фаолияти қонунчилик доирасида микрокредитлар бозорини ривожлантиришга хизмат қилади. Ушбу институт ММТларни қонунчиликка риоя қилишга ва хизмат кўрсатишнинг илғор тажрибаларини жорий этишга ундайди. Айтиш жоизки, айни пайтда мамлакатда банк ва суғурта омбудсманлари фаолият кўрсатмоқда.
Эслатиб ўтамиз, Қозоғистонда 2024 йил 1 октябрь ҳолатига кўра, 220 та микромолия ташкилоти, 215 та кредит жамияти ва 497 та ломбард фаолият юритмоқда.
