Қозоғистонда ер нархи қанча
ASTANА. Кazinform - Мамлакатда аҳоли ер участкасини Қозоғистон қонунчилигида рухсат этилган тартибда, асосан, уй ёки дала ҳовли қуриш мақсадида сотиб олади. Қишлоқ хўжалиги учун ер олиш ҳам мумкин. Республика ҳудудларида бундай ерларнинг нархи неча тенге? Kazinform шу мавзуни шарҳлади.
Шуни таъкидлаш керакки, энг паст нарх ва энг юқори нарх ўртасидаги фарқ жуда катта. Ер участкалари нархини ҳар томонлама очиб бериш мақсадида вилоят маркази ҳудудида ва ундан ташқарида хусусий уй-жой қуриш учун ер участкалари, шунингдек, қишлоқ хўжалигига мўлжалланган ер участкалари намуна сифатида олинди.
Хусусий уй-жой қуриш учун ер участкаларининг нархи қанча?
Хусусий уй-жой қурилишининг нархи кўп ҳолларда инфратузилманинг мавжудлигига, муҳандислик-коммуникация тармоқларини қуришга, жойлашувга (шаҳарда ёки шаҳар ташқарисида) боғлиқ. Баъзи участкалар меъморий лойиҳаси билан сотилади, бу ҳолда нарх юқори бўлиши табиийдир.
Шарҳни тайёрлаш жараёнида сотиладиган ер участкаларининг энг кўп тарқалган жойларига эътибор қаратилди. Кўчмас мулк ҳақидаги эълонлар жойлаштирилган сайтлардаги маълумотларга кўра, булар 6 ва 10 сотих бўш ер участкаларидир.
Бошқа ҳудудларга нисбатан Туркистон, Ўскемен, Жезқазған ва Петропавлда ер участкалари арзонроқ. Масалан, Туркистонда 6 сотих ернинг ўртача нархи - 5 миллион тенге, 10 сотих ернинг нархи 14-15 миллион тенге атрофида. Шаҳар атрофида бир оз арзонроқ - 2,5 миллион тенге.
Ўскеменда 6 сотих ер ўртача - 5,4 миллион тенге, 10 сотих ер 11 миллион тенге туради. Шаҳар четидаги ерлар 450 минг тенгедан 3,5 миллион тенгегача сотилади.
Жезқазғанда 5,5 миллион тенгега 6 сотих ер сотиб олиш мумкин. 10 сотих ер эса ўртача - 12,6 миллион тенге.
Петропавлда 6 сотих ер - 6 миллион тенге. Шаҳарда 10 сотих ер 9 миллионга, шаҳар четида 600 мингга сотилади.
Қонаев шаҳридан 6 сотих ер олиш учун харидор 7 миллион тенге тўлаши керак. 10 сотих ерга 18 миллион теенге сарфланади. Дала ҳовлилар массивида ва шаҳар атрофида нарх бироз пастроқ - 1,5 миллион тенгедан.
Павлодарда 6 сотих ернинг нархи 7 миллион тенге атрофида. 10 сотих ер 15 миллион тенгега тушади. Шаҳар ҳудудидан ташқаридаги участкалар арзонроқ бўлади: 10 сотих - 1 миллион тенге.
Талдиқорғанда 6 сотих ернинг ўртача нархи 7,5 миллион тенгега етади. Шаҳар атрофидаги ерлар 2 миллион тенгедан бошланади. Шаҳар ҳудудидаги 10 сотих ер 12-15 миллион тенгега тушади. Дала ҳовлилар массивида эса 1 миллион тенгега баҳоланмоқда.
Кўриниб турибдики, Семейда 6 сотих ер нархи баъзи шаҳарларга қараганда баландроқ. 6 сотих ернинг нархи 9 миллионга етади. 10 сотих бўлса - 13 миллион тенге. Шаҳар атрофидаги ерлар 800 000 тенгедан бошлаб сотилади.
Ақтўбеда 6 сотих ер ўртача - 9,5 миллион тенге, шаҳар ташқарисида эса 2-3,5 миллион тенге туради. Шаҳарда 13 миллион тенгелик 10 сотих ер участкасига талаб катта. Шаҳар ташқарисидан ер сотиб олувчи эса 400 000 тенгедан зиёдроқ пул тўлайди.
Кўкшетауда 6 сотих ернинг ўртача нархи - 9,7 миллион тенге. 10 сотих участканинг ўртача нархи тахминан - 15 миллион тенге. Шаҳар четидаги ерлар эса 2,5-4 миллион тенгега сотилмоқда.
Қизилўрдаликлар 6 сотих ерни 10 миллион тенгега сотиб олмоқда. 10 сотих ер олиш учун эса чўнтакда 12-13 миллион тенге бўлиши керак. Шаҳар ташқарисидаги ерлар 400 мингга баҳоланмоқда.
Қостанайда 6 сотих ернинг нархи ҳам худди шундай — 10 миллион тенге. 10 сотих ер эса анча қиммат — 22 миллион тенге.
Қарағандада 6 сотих ер тахминан 12 миллион тенгега тушади. Коммуникация бор ёки йўқлигига қараб, дала ҳовлилар массивида худди шундай ерлар 500 мингдан 1,2 миллион тенгегача сотилади. Шаҳардаги 10 сотих ер 28 миллион тенгега, шаҳар ташқарисида эса 1,5 миллион тенгега тушади.
Атирауда 6 сотих ер 12 миллион тенгега баҳоланган. 10 сотих ер участкаси 16,5 миллион тенгега сотилмоқда. Шаҳар атрофидаги ерлар 800 минг тенгедан 5 миллион тенгегача сотилади.
Таразда 6 сотих ернинг нархи 12-13 миллион тенге бўлади.Дала ҳовлилар массиви ва шаҳар атрофларида эса 2-3,5 миллион тенге. 10 сотих ер ўртача - 18-20 миллион тенге. Шаҳар атрофидаги ерларнинг нархи 2,5 миллион тенгедан бошланади.
Оралда 6 сотих бўш ер 15,4 миллион тенгега тушади. Шаҳар ташқарисидаги ва дала ҳовлилар массивидаги ерларнинг нархи эса 1,1 миллион тенгедан бошланади. 10 сотих ерга келсак, унинг нархи ўртача 35 миллион тенге, шаҳар атрофида эса 1,5 миллион тенге.
Ақтау шаҳрида хусусий уй-жой қуриш учун 6 сотих ернинг ўртача нархи - 18 миллион тенге, 10 сотих ернинг нархи эса 25 миллион тенге атрофида. Шаҳар ташқарисидаги ер эса шаҳардан узоқлиги ва денгиз соҳилига яқинлигига қараб 1,5-6 миллион тенге орасида.
Мегаполислардаги ер участкалари нархлари
Мамлакатнинг бир миллиондан ортиқ аҳолиси бўлган учта шаҳрида нархлар бошқа ҳудудларга нисбатан юқори.
Чимкентдан 6 сотих ер олиш учун 18-20 миллион тенге сарфлаш зарур. 10 сотих ер участкасини олиш учун 25-27 миллион тенге бўлиши керак. Шаҳар ташқарисидаги 10 сотих ер 2 миллион тенгедан бошланади.
Астанада 6 сотих ернинг ўртача нархи 33 миллион тенгени ташкил этади, аммо баъзан 6 сотих ер 90 миллион тенгега сотилмоқда. Шаҳар ташқарисидаги нарх 1,2 миллиондан 10 миллион тенгегача ўзгариб туради. 10 сотих ер эса ўртача 46-48 миллион тенге туради, лекин 110 миллион тенгелик ер участкалари ҳақидаги эълонларни ҳам учратиш мумкин. Шаҳар атрофидаги ерларнинг нархи эса 2 миллион тенгедан бошланади.
Алматида 56 миллион тенгенгиз бўлмаса, 6 сотих ер сотиб олиш мумкин эмас. Шаҳар атрофидаги ерлар 2,5 миллион тенгедан бошланади. Шаҳардаги 10 сотих ер тахминан 90 миллион тенгега тушади. Шаҳар атрофидаги ерлар (тоғ этаклари ва алоҳида туманлар) 3,5 миллион тенгедан сотилади.
Вилоятларда қишлоқ хўжалиги ерларининг нархи қанча?
Ҳудудларда фермер хўжаликлари ерлари нархининг шаклланишига унинг ҳудуди, яйлови бор ёки йўқлиги каби мезонлар таъсир кўрсатади.
Шимолий Қозоғистон вилоятида сотиладиган қишлоқ хўжалиги ерларининг майдони 13 гектардан 506 гектаргача ва нархи 1 миллиондан 30 миллионгача. Масалан, 71 гектар ер 5,7 миллион тенгега сотилмоқда.
Ақмола вилоятида сотиладиган ер майдони 1 гектардан 11,8 минг гектаргача. Нархи 1 миллиондан 875 миллион тенгегача. Аксарият эълонларда 10 гектаргача бўлган сотувга чиқарилган, нархи 20-22 миллион тенге экани ёзилган.
Улитау вилоятида сотиладиган қишлоқ хўжалиги ерларининг майдони 318 гектардан 5000 гектаргача. Уларнинг нархи 1 миллион тенгедан бошланиб, 20 миллион тенгегача етади. Масалан, 318 гектар ер 4,5 миллион тенгега, 5 минг гектар яйлов 1 миллион тенгега сотилмоқда.
Ақтўбе вилоятида 1,5 гектардан 30 минг гектаргача бўлган ерлар сотилмоқда. Нархи 3-350 миллион тенге орасида ўзгариб туради.
Атирау вилоятида қишлоқ хўжалигига мўлжалланган ерлар майдони 1,6 гектардан 1,2 минг гектаргача мавжуд. Нархи 1,6-450 миллион тенге орасида.
Туркистон вилоятида қишлоқ хўжалигига мўлжалланган ерлар кўп. Бу ерда 1 гектардан 1,5 минг гектаргача бўлган ерларни 1,9 миллиондан 230 миллионгача сотиб олиш мумкин. Аксарият ҳолларда ернинг қиймати унинг жойлашган жойига қараб белгиланади.
Тоғ ёнбағирларидан 100 гектар ерни 230 миллион тенгега сотиб олиш ёки 1-20 гектарлик кичик ер участкаларини 2-5 миллион тенгега сотиш мумкин.
Павлодар вилоятида 1 гектардан 3775 гектаргача бўлган ерлар 1-50 миллион тенгега сотилмоқда. Масалан, 152 гектар ер 15 миллионга, Баянаулдаги тоғ ёнбағиридаги 1600 гектар ер 25 миллионга сотилмоқда.
Шарқий Қозоғистон вилоятида 1,3 гектардан 1,5 минг гектаргача бўлган ер участкалари 1-200 миллион тенгега баҳоланади. Аксарият ҳолларда бир гектарнинг нархи 1 миллион тенге атрофида. Масалан, Қатонқарағайда 98 гектар ер 98 миллион тенгега сотилмоқда.
Манғистау вилоятида 1 гектардан 123 минг гектаргача бўлган ерлар ҳақидаги эълонларни учратиш мумкин. Қимматлари Каспий денгизи соҳилида жойлашган. Нархлар 1,2 миллиондан 50 миллион тенгегача ўзгариб туради.
Қизилўрда вилоятида 5 гектардан 1000 гектаргача бўлган ерларни 1,2-80 миллион тенгега сотиб олиш мумкин. Масалан, сув омбори ва ёзги уй ёнидаги 20 гектар ер сотувчиси 80 миллион тенге сўраяпти. Боғ барпо этишга яроқли 29 гектар унумдор ер эса 47 миллион тенгега тушади.
Жамбил вилоятида 3 гектардан 1,3 минг гектаргача бўлган ернинг нархи 1,8 миллиондан 264 миллион тенгегача сотилмоқда.
Иқлими ҳам деҳқончилик, ҳам чорвачилик учун қулай бўлган Қостанай вилоятида 8 гектардан 10 минг гектаргача бўлган ерлар сотилади. Нархи 900 минг тенгедан 55 миллион тенгегача. Масалан, Арқалиқ шаҳри яқинида 10 минг гектарнинг нархи - 50 миллион тенге.
Ғарбий Қозоғистон вилоятида 1 гектардан 1,4 минг гектаргача ер сотиб олиш мумкин. Нархи 1,5-120 миллион тенге орасида.
Абай вилоятида 5 гектардан 1,3 минг гектаргача бўлган ерлар сотилади. Нархи 3 миллион тенгедан 60 миллион тенгегача. Масалан, 50 гектар ер 34 миллион тенгега, 1,3 минг гектар ер эса 22 миллион тенгега баҳоланган.
Алмати вилоятида нархлар бошқа ҳудудларга нисбатан юқори: 1 гектардан 10 минг гектаргача бўлган ернинг нархи 400 минг тенгедан 7,8 миллиард тенгегача етади.
Қарағанди вилоятида 2 гектардан 7,5 минг гектаргача бўлган ер участкалари 3-200 миллион тенгега сотилмоқда. Вилоятдаги энг қиммат рекламани оладиган бўлсак, 7,5 минг гектар яйлов 200 миллион тенгега баҳолангани ёзилган.
Жетису вилоятида 2 гектардан 2 минг гектаргача бўлган ер участкалари сотувга қўйилган. Нархи 1,2 миллион тенгедан 950 миллион тенгегача. Агар энг қиммат таклифни олсак, чегара ва қуруқ порт яқинида жойлашган 50 гектар ер 950 миллион тенгега сотилмоқда.
