Қозоғистонда ер эгалари текширув ҳақида SМS орқали хабардор қилиниши мумкин
ASTANА. Кazinform - Эндиликда ер эгалари давлат текширувлари ҳақида хат орқали эмас, SМS орқали хабардор қилиниши мумкин. ҚР Мажилисида шундай таклиф билдирилди ва масъул идоралар вакиллари қўллаб-қувватлади.
– Тадбиркорлик кодекси талабларига кўра, ер участкасининг ўзлаштирилишини текширишдан аввал мулкдорга почта орқали хат юборилади ва ёзма равишда огоҳлантирилади. Лекин ерни ноқонуний эгаллаб олганлар, тўғри ўзлаштирмаётган тадбиркорлар, жумладан, фирибгарлар, олигархлар почтадан хат олишдан қочади. Шу сабабли, ер ресурсларини бошқариш органи инспекторлари текширишни бошлай олмайдилар. Энди солиқ органлари ва полицияда SМS-хабар механизми мавжуд. Нима учун ерни текшириш амалиётида почта хати ўрнига SМS ишлатмаслик керак? Шундай бўлса, ҳозиргидек қийналмасдик, - деди депутат Бақитжан Базарбек.
ҚР Рақамли ривожланиш, инновациялар ва аэрокосмик саноат вазири ўринбосари Асхат Оразбек бу таклифни қўллаб-қувватлашини, бироқ бошқа вазирлик билан маслаҳатлашганидан кейингина аниқ қарор қабул қилиниши мумкинлигини айтди.
“Қазпочта” акциядорлик жамияти бошқаруви раиси Асел Жанасованинг айтишича, жорий йилнинг ўтган даврида “Қазпочта” томонидан юборилган хатлардан бўйин товлаш бўйича икки ҳолат қайд этилган.
- Жорий йилда иккита шундай ҳолат кузатилди. Биз ўша фактларни ҳуқуқ-тартибот идораларига юбордик. Бизда асосан SМS-хабарларни юборадиган ва улар олинган ёки олинмаганлигини аниқлайдиган хизматлар мавжуд. Буни Рақамли ривожланиш вазирлиги билан биргаликда амалга оширамиз ва келгуси йил якунлаймиз, - деди “Қазпочта” раҳбари.
