Қозоғистонда демографларни тайёрлаш таклиф қилинмоқда

ASTANА. Кazinform – Сенат раисининг маслаҳатчиси Жулдизай Исқақова Қозоғистон олий таълим муассасаларида демография бўйича янги таълим дастурини очишни таклиф қилди.

Сенат раиси маслаҳатчисига кўра, мамлакатда демографик ривожланиш концепциясини қабул қилиш зарур.

— Миллий иқтисодиёт вазирлигининг жавобида ушбу ҳужжатни қабул қилиш мақсадга мувофиқ эмаслиги айтилган. Чунки давлат режалаштириш тизими мутаносиб, ватандошларни қабул қилиш масалалари тартибга солинган, туғилишнинг ўсиши тенденцияси кузатилмоқда. Бироқ, менимча, 2021 йилдан бошлаб туғилиш кўрсаткичи, аксинча, пасаймоқда. Ҳудудий ривожланишда ҳам сезиларли номутаносиблик мавжуд. Шунинг учун кўплаб мамлакатлар тажрибасидан келиб чиқиб, биз ҳам ушбу концепцияни кўриб чиқишимиз керак, деб ҳисоблайман, — деди Жулдизай Исқақова Сенатнинг Ижтимоий-маданий ривожланиш ва фан масалалари қўмитаси йиғилишида.

Бугунги кунда Фан ва олий таълим вазирлиги маълумотларига кўра, “Демография” мутахассислиги таълим дастурларининг “Тарих” гуруҳи доирасида ўқитилади.

— Аммо тарих ўтмишни ўрганади, демография эса келажакка қаратилган фандир. Олий таълим муассасаларида янги дастур очиш осон эмаслигини тушунамиз. Бундан ташқари, кўплаб университетлар нотижорат акциядорлик жамиятлари мақомига эга, шунинг учун улар ўзлари қарор қабул қиладилар. Бироқ, биз давлат томонидан қўллаб-қувватланишини сўраймиз, — деди Сенат спикери маслаҳатчиси.

Унинг сўзларига кўра, ўтган йили Л.Гумилёв номидаги Евросиё миллий университетида Россия олий иқтисодиёт мактаби вакиллари билан учрашув ўтказиб, ушбу йўналишни давом эттириш имкониятлари муҳокама қилинган.

— Фан ва олий таълим вазирлиги бизга янги йўналиш очиш осон эмаслигини айтди. Шу боис Қозоғистон демографлар ассоциацияси, Хотин-қизлар ишлари бўйича миллий комиссия ва экспертлар уюшмаси билан қўшимча йиғилиш ўтказишни сўраймиз. Ҳозирги вақтда социологлар демографик тенденцияларни ўрганмоқдалар, шунингдек, Евроосиё университетида пилот лойиҳа сифатида алоҳида мутахассислик очиш имконияти мавжуд. Бунинг учун давлат грантлари керак, ҳал этилиши керак бўлган кўплаб масалалар бор, - дея хулоса қилди Жулдизай Исқақова.

Эслатиб ўтамиз, аввалроқ ҚР Парламенти Сенати Қозоғистон ва Ўзбекистон ўртасидаги савдо алоқаларини мустаҳкамловчи ҳужжатни маъқуллагани ҳақида хабар берган эдик.