Қозоғистонда бугундан “Миллий жамғарма - болаларга” лойиҳаси расман ишга туширилди
2024 йил 1 январдан “Миллий жамғарма - болаларга” лойиҳаси расман ишга туширилди. Дастлабки маълумотларга кўра, лойиҳа биринчи йилда 7 миллиондан ортиқ болани қамраб олади, деб хабар беради Kazinform.
Миллий жамғарма бошқаруви Миллий банк тасарруфида бўлса-да, “Миллий жамғарма - болаларга” лойиҳасининг мувофиқлаштирувчиси Молия вазирлиги ҳисобланади.
Оператор эса Ягона жамғариб бориладиган пенсия фондидир.
2024 йил 1 январь ҳолатига кўра, 18 ёшгача бўлган болалар рўйхати Адлия вазирлиги маълумотлар базаси маълумотлари асосида тузилади.
Ўша рўйхат асосида Миллий жамғарма инвестиция даромадининг ярми қанча болага тенг бўлиниши кераклиги маълум бўлади.
2024 йилнинг 1 февралида ушбу ҳисобот асосида 18 ёшгача бўлган барча болаларга бир хил миқдорда пул ўтказилади.
18 ёшга тўлгандан сўнг, бола Миллий жамғармадан олинган тўловни уй-жой сотиб олиш, таълим олиш, шу жумладан чет элда ўқиш имконияти учун ишлатиши мумкин.
Лекин уй-жой фақат Қозоғистон ҳудудида сотиб олиниши керак.
Бола вафот этган тақдирда миллий жамғарма тўловини ўтказиш тўхтатилади. Бундай ҳолда, мерос ҳуқуқи кучга киради.
Бундай боланинг меросхўри ким бўлиши мумкинлиги Фуқаролик кодексининг махсус қисмида кўрсатилган, яъни ҳар бир боланинг меросхўри муайян вазиятга қараб белгиланади.
Қонуний меросхўр боладан қолган пулни ўзи хоҳлаганча ишлатади.
Бола Қозоғистон фуқаролигини йўқотганда, Миллий жамғармадан тўлов ўтказилмайди.
Агар фарзандингиз ҳақидаги маълумотлар eGovда мавжуд бўлмаса, платформада “болани қўшиш” тугмаси мавжуд.
Унга босиш ва боланинг шахсий ижтимоий рақамини киритиш орқали рўйхатдан ўтиш мумкин.
Агар рўйхатдан ўтиш пайтида маълумот кўринмаса, "тузатиш" тугмасига ўтинг ва ҳужжатингизни ва фарзандларингизнинг туғилганлик ҳақидаги гувоҳномасини киритинг.
Миллий жамғармадан болаларга ажратиладиган тўлов солиққа тортилмайди.
Жараён тўлиқ автоматлаштирилганлиги сабабли ота-оналар ҳеч қандай ҳужжат йиғишлари шарт эмас.
Ягона жамғариб бориладиган пенсия фонди Адлия вазирлиги билан ҳамкорликда тегишли интеграция ишларини олиб бормоқда.
Бола 18 ёшга тўлганидан кейин ҳисобдаги маблағлар 10 йил давомида сақланади. Агар ушбу 10 йил давомида ҳисобварақдаги маблағлар талаб қилинмаса, улар ўша шахснинг пенсия ҳисобварағига ўтказилади.
Боланинг ҳисобидаги пуллар долларда сақланади ва бола 18 ёшга тўлганидан кейин 10 йил ичида керакли вақт курси бўйича тенгеда ўтказилади.
Нақд пулда эмас, фақат пул ўтказмаси орқали фойдаланиш мумкин.
