Қозоғистонда 62 мингдан ортиқ киши қисқа муддатли касбий таълим курсини тамомлади
ASTANА. Кazinform — 2024 йилда 62,1 минг киши ўз малакасини ошириш ва янги мутахассисликларни ўзлаштириш учун қисқа муддатли касбий таълим курсини тамомлади, деб хабар беради ҚР Меҳнат вазирлиги.
Қисқа муддатли касб-ҳунар таълими ишсиз фуқароларга бир неча ой ичида меҳнат бозорида талаб қилинадиган касбий билим ва кўникмаларга эга бўлиш имконини беради.
Таълим ўқув даргоҳларида (курслар иш берувчиларнинг илтимосига биноан ташкил этилади), иш берувчиларнинг иш жойида, шунингдек, талаб қилинадиган касблар рўйхати бўйича Skills Enbek қисқа муддатли ўқув порталида олиб борилади.
Касбий таълимнинг давомийлиги малака ва кўникмаларнинг ўзига хос хусусиятларига қараб 6 ойдан ортиқ бўлмаган муддатни ташкил қилади.
— Ҳудудлар бўйича ўқишга юборилганларнинг энг кўп сони Ақтўбе — 11 минг киши, Қостанай — 4,7 минг киши, Жамбил — 4,5 минг киши, Туркистон вилоятларида — 4,1 минг киши, Алмати шаҳрида — 4,3 минг кишини ташкил этади. 2024 йилда Карьера марказлари томонидан 7,8 минг киши таълим муассасаларига ўқишга юборилди, шундан 6,7 минг нафари ўқишни тамомлади. Ўқув курсларини тамомлагандан сўнг 5,9 минг киши иш билан таъминланди, — дейилади Меҳнат ва аҳолини ижтимоий ҳимоя қилиш вазирлиги хабарида.
Ишсизларни иш жойида ўқитиш корхона ва ташкилотларда иш берувчи томонидан тажрибали ходимлар орасидан малакали мураббий тайинланган ҳолда ташкил этилади. Ўқиш даврида иш берувчи ва ишсизлар ўртасида меҳнат шартномаси тузилади. Меҳнат ҳаракатчанлиги маркази 20 БҲМ миқдорида иш ҳақини бевосита талабанинг ҳисоб рақамига юборади.
2024 йилда 1948 киши курсда таълим олди, шундан 1769 нафари ўқишни тамомлади. Ўқишни тамомлагандан сўнг 1481 нафар киши ёки 83,7 фоиз иш билан таъминланди.
2024 йилда Skills Enbek портали орқали 52,4 минг ишсизлар онлайн курсларда қатнашди.
Қисқа муддатли таълимни тамомлаганлар орасида энг оммабоп касблар: тикувчи – 1328 нафар, ошпаз – 1090 нафар, сартарош – 805 нафар, қандолатчи – 409 нафар, электр ва газ пайвандчиси – 289 нафар.
Эслатиб ўтамиз, қисқа муддатли касб-ҳунар таълимидан ўтиш учун яшаш жойидаги Карьера марказига, қишлоқ жойларда эса аҳоли пунктлари, қишлоқ туманлари, туман аҳамиятидаги шаҳарлар ҳокимларига мурожаат қилиш лозим.
Касб-ҳунарга ўқиётган фуқароларга ўқиш тўлови, стипендия ёки иш ҳақи, йўл ҳақи давлат томонидан тўланади.
Яшаш жойидан ташқаридаги аҳоли пунктида ўқиётганда, талабага турар жой учун моддий ёрдам кўрсатилади (уй-жой ижараси харажатларини қоплаш).
Эслатиб ўтамиз, аввалроқ ҚР Меҳнат вазирлиги инклюзив сиёсат концепциясини ишлаб чиқишга киришгани ҳақида хабар берган эдик.
