Қозоғистонда 2 миллионга яқин болалар ёзги мактабларда ўқишни давом эттирмоқда

NUR-SULTAN. Кazinform - Мамлакатда 26 майдан ёзги мактаб бошланди. У 2022 йил 17 июнгача давом этади. Бугунги кунда 2 миллионга яқин болалар бу имкониятдан фойдаланиб, ўз билимини оширмоқда, деб хабар беради ҚР Таълим ва фан вазирлиги матбуот хизмати.

Уларнинг барчаси ўз вақтларини самарали ўтказадилар ва қулай жадвал ҳамда қизиқарли форматда ўқийдилар. Эслатиб ўтамиз, ёзги мактаблар имтиҳон топширадиган 9-11-синф ўқувчиларидан ташқари барча ўқувчилар учун ташкил этилади.

Ўқувчилар душанбадан жумагача дарсларда қатнашадилар. Ўқиш, математика, қозоқ тили, инглиз тили, физика, кимё ва бошқа асосий фанларни ўқийдилар.

«Ёзги мактабда дарслар синфдаги ўқувчилар сонидан қатъий назар ўтказилади. Бу болалар учун яхши имконият. Чунки ҳар бир ўқувчи билимдаги камчиликларни тўлдириб, янги билим олади. Машғулотлар қулай жадвалга мувофиқ қизиқарли форматда ўтказилади. Масалан, дарслар музейларда, тоза ҳавода ўтказилади, турли экскурсиялар ташкил этилади. Биз биламизки, ёзда болалар телефон ўйинлари билан вақт ўтказишади. Албатта, агар имконият берилса, ота-оналар фарзандларининг китоб ўқиш ёки таълим олишга вақт ажратишларига ишонч ҳосил қилишлари керак. Болаларнинг ёзги мактабда ўқишга бўлган қизиқиши ва рағбатини ошириш мақсадида ўқитувчилар томонидан баҳолар қўйилмайди, уйга вазифа берилмайди. Мактаб маъмурияти ва ўқитувчилари ёзги мактабни янада қизиқарли ҳамда мазмунли ўтказиш учун ҳамма нарсани қилишлари керак. Ота-оналар аллақачон ижобий фикрларини билдиришмоқда», - дейди ҚР Таълим ва фан вазирлиги Мактабгача ва ўрта таълим қўмитаси раиси Гулмира Каримова.

Ёзги мактаб тугагач, ўқитувчилар йиллик таътилга чиқадилар, бу таътил 42 кундан 56 кунга узайтирилди.