Қозоғистонда 1 миллионга яқин бола боғчага боради
ASTANA. Kazinform – Қозоғистонда мактабгача таълим тизими жадал ривожланмоқда. Давлат раҳбарининг топшириғига мувофиқ 2023-2027 йилларга мўлжалланган болалар боғчаларини ишга тушириш бўйича босқичма-босқич режа тасдиқланди. Бу ҳақда ҚР Таълим-маориф вазирлиги матбуот хизмати хабар берди.
2025 йилда 2 ёшдан 6 ёшгача бўлган болаларни сифатли мактабгача таълим ва тарбия билан қамраб олишни 95 фоизга ошириш режалаштирилган. Шу мақсадда 64 минг янги ўрин очилади, йил бошидан буён 1,6 минг ўринли 20 та мактабгача таълим муассасаси фойдаланишга топширилди.
Мактабгача таълимни қамраб олишни ошириш ишлаётган болалар боғчаларини қуриш, реконструкция қилиш, модернизация қилиш, кичик марказлар сонини кўпайтириш, шунингдек ваучер молиялаштириш орқали давлат буюртмасини жорий этиш ҳисобига амалга оширилмоқда.
“Ваучер билан молиялаштириш тизими ишга туширилгандан буён ота-оналарга 99 минг та йўлланма берилди, бу эса улар учун мустақил равишда боғча танлаш имкониятидир. Давлат маблағларининг маълум бир ташкилотга эмас, балки маълум бир болага йўналтирилиши молиялаштириш механизмини оммавий қилади. Пилот лойиҳада Тараз, Туркистон, Чимкент, Орал ва Астана шаҳарлари иштирок этмоқда. Ҳудудларнинг тайёргарлигига қараб дастур кенгайтирилади”, – дейди Таълим-маориф вазирлигининг Мактабгача таълим департаменти директори Манар Адамова.
Умуман олганда, 2027 йилгача комплекс режа доирасида мактабгача таълим муассасаларида 300 мингта янги ўрин фойдаланишга топширилиши режалаштирилган. Бугунги кунда Қозоғистонда қарийб 1 миллион 11,6 минг бола боғчага қатнайди.
