Қозоғистон жаҳон ОАВларида: виза режимини соддалаштириш, тинчлик ташаббуси
ASTANА. Кazinform – Одатдагидек, яқин ва узоқ ОАВлардан Қозоғистон ҳақида кўплаб янгиликлар нашр қилинди. Хусусан, Астананинг Боку ва Ереван ўртасидаги тинчликни қўллаб-қувватлаши, Европа Иттифоқи билан алоқаларни кучайтириши ҳақидаги маълумотлар эътибордан четда қолмади. Бундан ташқари, Марказий Осиё Кўҳна қитъа давлатлари билан биргаликда Транскаспий халқаро транспорт йўналишини ривожлантиришдан манфаатдор. Ўз навбатида қўшни Ўзбекистон Қозоғистон билан савдо айланмасини оширишни мақсад қилган. Батафсил Кazinform мухбири шарҳида ўқинг.
Report: Европа Комиссияси ва Қозоғистон виза тартибини соддалаштириш бўйича келишувларни бошлади
Қозоғистон Президенти Қасим-Жомарт Тоқаев ва Европа Иттифоқининг ташқи ишлар ва хавфсизлик сиёсати бўйича Олий вакили ҳамда Европа комиссияси вице-президенти Кайя Каллас учрашиб, кенг қамровли ҳамкорлик истиқболларини муҳокама қилди. Бу ҳақда Report Ақордага таяниб хабар берди.
Каллас, аввало, Қозоғистон Европа Иттифоқи билан Кенгайтирилган шериклик ва ҳамкорлик шартномасини имзолаган биринчи давлат эканлигини таъкидлади. Унинг сўзларига кўра, бу икки томонлама муносабатлар юксак даражада ривожланганидан далолатдир. Шунингдек, у Еврокомиссия ва Қозоғистон ўртасида виза тартибини соддалаштириш бўйича келишувни тузиш тартиби бошланганини маълум қилди.
Ўз навбатида, Қасим-Жомарт Тоқаев Қозоғистон бу янгиликни олқишлашини, чунки кейинги қадам Европа давлатлари билан бизнес ва шахслараро алоқаларни мустаҳкамлаш учун кенг имкониятлар очаётганини айтди.
Бундан ташқари, учрашувда энергетика, саноат, рақамлаштириш каби устувор йўналишларда савдо-иқтисодий ҳамкорликни кенгайтириш, шунингдек, Транскаспий транспорт йўлагини ривожлантиришга қаратилган йирик инфратузилма лойиҳаларини амалга ошириш масалалари муҳокама қилинди.
Anadolu: Астана Боку ва Ереван ўртасидаги тинчлик шартномаси лойиҳасини олқишлади
Яқинда Қозоғистон Президенти Қасим-Жомарт Тоқаев Арманистон ташқи ишлар вазири Арарат Мирзоянни қабул қилди. Шу ўринда Қозоғистон томони Ереван ва Боку ўртасида тинчлик ва давлатлараро муносабатлар тўғрисидаги шартнома лойиҳаси матни бўйича музокаралар якунланганидан мамнунлигини билдирди. Бу ҳақда Туркиянинг Anadolu агентлиги Ақордага таяниб хабар берди.
Ушбу муҳим воқеа Арманистон ва Озарбайжон ўртасида тинчлик ўрнатилишидан дарак беради ҳамда минтақанинг Қозоғистон ва Марказий Осиёнинг барча давлатлари билан ҳамкорлигини мустаҳкамлашга хизмат қилади.
Қасим-Жомарт Тоқаев президентларнинг ўтган йилги ўзаро ташрифлари Қозоғистон-Арманистон муносабатларини ҳар томонлама ривожлантиришга сезиларли туртки берганини таъкидлади.
Ўз навбатида, Арманистон дипломати Қозоғистон Президентига самимий қабул учун миннатдорчилик билдирди. Дипломатик хизмат раҳбари Арманистон ва Қозоғистон ташқи ишлар вазирликлари, шунингдек, бошқа идоралар Қасим-Жомарт Тоқаевнинг ўтган йили Ереванга расмий ташрифи чоғида эришилган келишувларни амалга ошириш устида иш олиб бораётганини маълум қилди.
Учрашувда савдо-иқтисодий, сармоявий, транспорт-логистика ва маданий-гуманитар соҳаларда икки томонлама муносабатларни ривожлантириш истиқболлари муҳокама қилинди. Қозоғистон Президенти маҳаллий бизнес Арманистонга маҳсулот етказиб беришни 350 миллион долларга оширишга тайёрлигини маълум қилди.
Trend: Ўрта йўлакни кенгайтириш масаласи муҳокама қилинди
Ашхободда Қозоғистон, Тожикистон, Туркманистон, Қирғизистон ва Ўзбекистон ташқи ишлар вазирликлари вакиллари иштирокида Европа Иттифоқи ва Марказий Осиёнинг XX йиғилиши бўлиб ўтди. Бу ҳақда Озарбайжоннинг Trend нашри хабар берди.
Биринчидан, вазирлар 2024 йил январь ойида Брюсселда бўлиб ўтган Global Gateway инвесторлар форуми муваффақиятини қайд этиб, Европа ва халқаро молия институтларининг Транскаспий халқаро транспорт йўналишига 10 миллиард евро сармоя киритиш мажбуриятларини олқишладилар. Улар ушбу йўлак Марказий Осиё ва Европа ўртасидаги алоқани яхшилаш, шунингдек, минтақавий иқтисодий ўсишни рағбатлантириш учун муҳимлигини таъкидладилар.
Учрашув иштирокчилари Қозоғистоннинг 2024 йил июнь ойида Ўрта йўлак бўйича Мувофиқлаштирувчи платформани ишга туширишни ташкил этишдаги муҳим ролини, 2024 йил октябрь ойида эса Туркманистоннинг юқори даражадаги тадбирга мезбонлик қилишидаги муҳим ролини қайд этдилар.Жанубий Кавказ билан минтақавий савдо ва логистикани ривожлантириш бўйича ҳамкорликни олқишладилар.
Бундан ташқари, Европа Иттифоқи – Марказий Осиё муносабатларида муҳим хомашё ресурсларига эътибор қаратиш масаласи муҳокама қилинди. Вазирлар маҳаллий ишлаб чиқариш ва етказиб бериш занжирларини мустаҳкамлаш, халқаро стандартларга мувофиқлик ва барқарор инвестицияларни қўллаб-қувватлашга қаратилган ЕИ ва Қозоғистон, шунингдек, ЕИ ва Ўзбекистон ўртасидаги стратегик шерикликни қўллаб-қувватладилар.
Ўрта йўлак бир қанча давлатлардан ўтувчи ва Осиёни Европа билан боғлайдиган транспорт ва савдо йўлидир. Бу анъанавий Шимолий ва Жанубий коридорларга муқобил сифатида кўриб чиқилмоқда. Йўналиш Хитойдан бошланиб, Қозоғистон, Ўзбекистон ва Туркманистон каби Марказий Осиё давлатларидан ўтади. Кейин Каспий денгизи, Озарбайжон, Грузия ва Туркияни кесиб ўтиб, Европага етиб боради. Йилдан-йилга бу йўналиш томонлар учун муҳим бўлиб бормоқда.
Daryo: Қозоғистон ва Ўзбекистон 2030 йилга бориб товар айирбошлаш ҳажмини 10 миллиард долларга етказишни режалаштирмоқда
2024 йилда икки давлат ўртасидаги товар айирбошлаш ҳажми 4,3 миллиард долларга етди. Ўсиш озиқ-овқат ва тўқимачилик маҳсулотлари, рангли металлар, кимё маҳсулотлари, пластмасса маҳсулотларида қайд этилди. Бу ҳақда Ўзбекистоннинг Daryo нашри хабар берди.
Ўзбекистонда Қозоғистон капитали иштирокидаги 1042 та корхона, асосан, савдо, ахборот технологиялари, қурилиш, молия, кўчмас мулк соҳаларида фаолият юритмоқда. Қозоғистонда Ўзбекистон капитали иштирокидаги 4500 дан ортиқ компания рўйхатга олинган. Шу куни тадбиркорларни қўллаб-қувватлашни кенгайтириш бўйича келишувга эришилди.
Март ойи ўрталарида Ўзбекистон инвестициялар, саноат ва савдо вазири Лазиз Қудратов ва Қозоғистон савдо ва интеграция вазири Арман Шаққалиевнинг учрашуви бўлиб ўтди. Томонлар икки томонлама келишувларни амалга ошириш ва савдо-иқтисодий ҳамкорликни янада мустаҳкамлаш чора-тадбирларини муҳокама қилдилар.
Натижада 2030 йилгача товар айирбошлаш ҳажмини 10 миллиард долларга етказиш дастури имзоланди. Минтақа раҳбарларининг 2025 йилга мўлжалланган ташрифлари жадвали ҳам тасдиқланди.
Ўзбекистон томони Термиз халқаро савдо марказида Қозоғистон маҳсулотлари павильонининг очилишини таъкидлаб, унинг харидоргир бўлишига ишонч билдирди.
