Қозоғистон жаҳон ОАВларида: Иордания билан ҳамкорлик, визани соддалаштириш ва транзитни ошириш
Бу ҳафта ҳам ҳар доимгидек жаҳон оммавий ахборот воситалари Қозоғистон билан боғлиқ муҳим янгиликлар билан бўлишди. Давлат раҳбарининг Иорданияга расмий ташрифи, Франция билан виза тартибини соддалаштириш, транзит салоҳиятини икки баробар ошириш масалаларига устувор аҳамият қаратилди. Бундан ташқари, ўтган йил охирида Ақтау яқинида ҳалокатга учраган самолётнинг тергови ҳам муҳокама қилинди. Батафсил Kazinform мухбири шарҳида ўқинг.
Report: Икки томонлама муносабатларнинг аҳамияти ошди
Қозоғистон Президенти Қасим-Жомарт Тоқаев Иорданияга расмий ташрифи доирасида Подшоҳ Абдулла бин Ал-Ҳусайн билан учрашди ва музокаралар якунлари бўйича қўшма баёнот қабул қилди. Бу ҳақда Ақорда матбуот хизматига таяниб Озарбайжоннинг Report нашри хабар берди.
Баёнотда давлат раҳбарлари умумий қадриятлар ва манфаатларга асосланган икки томонлама муносабатларни янада мустаҳкамлаш муҳимлигини тасдиқладилар ҳамда барча даражадаги мулоқотни давом эттириш истагини билдирдилар.
“Энергетика, қишлоқ хўжалиги, инфратузилма, ахборот технологиялари, қайта ишлаш саноати ва фармацевтика каби соҳаларда ўзаро манфаатли савдо-иқтисодий ҳамкорликни такомиллаштириш зарурлиги қайд этилди. Савдо-иқтисодий алоқаларни мустаҳкамлаш, турли соҳаларда қўшма лойиҳаларни амалга ошириш учун қулай шарт-шароитлар яратиш мақсадида янги имкониятларни ўрганиш бўйича келишувларга эришилди. Томонлар ядровий соҳадаги ҳамкорликни кенгайтиришга тайёр эканликларини тасдиқладилар”, — дейилади ҳужжатда.
Иордания ва Қозоғистон ўртасидаги савдо-иқтисодий муносабатларни мустаҳкамлашга хизмат қилувчи транспорт-логистика йўналишларини, жумладан, Транскаспий халқаро транспорт йўналишини ривожлантириш муҳимлиги қайд этилди. Шунингдек, туризм соҳасини ривожлантириш ва ишбилармонлик алоқаларини жонлантириш мақсадида икки давлат ўртасида тўғридан-тўғри ҳаво қатновини очиш имкониятлари муҳокама қилинди.
Баёнотга кўра, Президент Қасим-Жомарт Тоқаев ва Подшоҳ Абдулла бин Ал-Ҳусайн таълим соҳасидаги ҳамкорликни кенгайтириш, жумладан, талабалар ва ўқитувчилар алмашинуви, қўшма таълим дастурларини ишлаб чиқиш ва илмий тадқиқотлар олиб боришга келишиб олдилар. Шунингдек, улар халқлар ўртасидаги дўстликни мустаҳкамлашга хизмат қилувчи қўшма тадбирлар, жумладан, кўргазмалар ва маданият кунларини ташкил этиш орқали алоқаларни яхшилаш ниятида эканликларини тасдиқладилар.
CentralAsia: Қозоғистон ва Франция виза режимини соддалаштириш масаласини муҳокама қилди
Қозоғистон Ташқи ишлар вазирлиги раҳбари ўринбосари Алибек Бақаев Франция Ички ишлар вазирлигининг махсус вакили Патрик Стефанини билан музокаралар ўтказди. Учрашувда консуллик-ҳуқуқий ва миграция соҳаларидаги ўзаро ҳамкорлик масалалари муҳокама қилинди, деб ёзади CentralAsia.
Томонлар Франциянинг миграцияни бошқариш борасидаги саъй-ҳаракатларига эътибор қаратиб, мамлакатлар ўртасидаги ҳамкорликнинг стратегик моҳиятини муҳокама қилдилар. Франция томони қонуний миграцияни қўллаб-қувватлаш чораларини, жумладан, ёш олимлар ва талабалар учун дастурларни таклиф қилди.
Муҳокаманинг асосий мавзуси Қозоғистон фуқаролари учун виза режимини соддалаштириш бўлди. Европа Иттифоқи билан визани соддалаштириш бўйича музокараларга ёрдам бергани учун Францияга алоҳида миннатдорчилик билдирди. Шунингдек, иқтисодиёт, маданият ва илм-фан соҳаларидаги алоқаларни ривожлантиришга хизмат қилувчи хизмат сафарларига кўмаклашиш ташаббуслари ҳам кўриб чиқилди.
Trend: Қозоғистон транзит ташиш ҳажмини 74 миллион тоннага оширишни режалаштирмоқда
2024 йил якунларига кўра, Қозоғистон орқали транзит ташиш ҳажми 34 миллион тоннадан ошди. Бу кўрсаткич 2023 йилга нисбатан 6 фоизга кўпдир. Бу ҳақда Қозоғистон Транспорт вазирлиги қошидаги Транспорт сиёсати департаменти директори Нурлан Кенесов баёнот берди, деб ёзади Trend.
Мамлакатимиз орқали ўтаётган транзит юкларининг 80 фоизи темир йўл, 20 фоизи автомобиль транспортида ташилган. Қозоғистоннинг транспорт-логистика салоҳиятини 2030 йилгача ривожлантириш концепцияси доирасида инфратузилмани ривожлантириш бўйича комплекс чора-тадбирлар амалга оширилмоқда.
Транскаспий халқаро транспорт йўналиши ва “Шимол-Жануб” йўлагининг шарқий йўналишига алоҳида эътибор қаратилмоқда. Шундай қилиб, 2030 йилга бориб Қозоғистон транзит ташиш ҳажмини 74 миллион тоннага етказишни режалаштирмоқда.
Daryo: Озарбайжон самолётининг қулаши сабаблари йил охиригача аниқланади
Ақтау яқинида Azerbaijan Airlines (AZAL) самолётининг қулаши сабабларини текшириш 2025 йил декабрида якунланиши режалаштирилган. Бу ҳақда ҚР Транспорт вазири ўринбосари Талғат Ластаевнинг нутқига таяниб, Daryo хабар берди.
Халқаро фуқаро авиацияси ташкилоти (ИКАО) талабларига кўра, бундай текширувлар одатда бир йил давом этади.
2024 йилнинг 25 декабрида Ақтау аэропортидан уч километр узоқликда Озарбайжоннинг AZAL авиакомпаниясининг Embraer самолёти қулаб тушди. Боку-Грозний рейсини амалга ошираётган самолёт фавқулодда қўнмоқчи бўлган вақтда ҳалокатга учради. Самолёт бортида 62 нафар йўловчи ва 5 нафар экипаж аъзоси бўлган.
ИКАО конвенциясига кўра, терговга Қозоғистон раҳбарлик қилади. Ишда озарбайжонлик, россиялик мутахассислар, халқаро экспертлар, шунингдек, Embraer самолётларини ишлаб чиқарувчи компания вакиллари иштирок этади.
29 декабрда Озарбайжон президенти Илҳом Алиев самолёт Россия ҳудудидаги Грозний яқинида радиоэлектрон жанговар жиҳозлар таъсирида ташқи томондан шикастлангани, натижада у бошқарувни йўқотганини маълум қилди. Бироқ ҳодиса сабабларига расман ойдинлик киритилмаган.
