Қозоғистон янги инвестор визасини жорий этади

ASTANA. Kazinform — Қозоғистон Республикаси халқаро бизнесга яқинлашиш йўлида яна бир муҳим қадам ташлади. Ташқи ишлар вазирлиги ташаббуси билан мамлакатимизнинг сармоявий жозибадорлигини ошириш ва узоқ муддатли бизнес ҳамкорликни қўллаб-қувватлашга қаратилган инвестор визасини олиш қоидалари тасдиқланди.

Янги талабларга кўра, Қозоғистон компанияларининг устав капиталига ёки маҳаллий қимматли қоғозларга камида 300 минг доллар сармоя киритган хорижий фуқаролар инвестор визасини олиш учун электрон ариза топширишлари мумкин. Бу “олтин виза” Қозоғистонда 10 йилгача яшаш учун рухсат олиш имкониятини беради.

“Бундай виза дастурлари халқаро амалиётда (жумладан, Европа давлатлари, АҚШ, БАА ва Сингапурда) кенг қўлланилади ва капитал, технология ва тадбиркорлик фаоллигини жалб қилишнинг самарали воситаси сифатида ўз самарадорлигини исботлади. Қозоғистон ҳам ушбу амалиётга қўшилади ва ўзининг инвестиция резидентлиги моделини таклиф этади.

“Олтин визалар” хорижий сармоядорлар учун қулай ва прогноз қилинадиган муҳитни яратиш, ҳуқуқий кафолатлар бериш ва мамлакат сармоявий муҳитига ишончни мустаҳкамлашга қаратилган. Ушбу янги ташаббус мамлакатнинг шаффофлик, капитал ҳимояси ва барқарор халқаро иқтисодий алоқаларни ривожлантиришга қаратилган стратегик йўналишини акс эттиради”, - дейилади ТИВ баёнотида.

Ҳужжат расмий эълон қилинган кундан бошлаб 10 кун ўтгач кучга киради.