Қозоғистон ва Ўзбекистон таълим соҳасида ҳамкорлик доирасида янги шартнома имзолайди
Бу ҳақда Нур-Султан шаҳрида Қозоғистон Таълим ва фан вазири Асхат Аймағамбетов ва Ўзбекистон Республикаси таълим вазири Бахтиёр Саидов ўртасидаги учрашувда маълум қилинди, дея хабар беради Kazinform.
Ўзбекистон делегациясининг асосий мақсади Қозоғистон таълим тизимига жорий этилаётган янгиликлар билан яқиндан танишишдир.
Ўзбекистон томони икки давлат ўртасида ҳамкорлик тўғрисидаги шартнома 1994 йилда имзоланганини таъкидлади. Суҳбат чоғида вазир янгиланган ҳужжат икки республика ўртасидаги таълим соҳасидаги ҳамкорликни мустаҳкамлаш ва янги босқичга олиб чиқишга хизмат қилишини таъкидлади.
Эслатиб ўтамиз, Қозоғистонга ташриф буюрган Ўзбекистон Республикаси таълим вазири биринчи навбатда пойтахт мактабларида бўлди.
«Менимча, шартнома лойиҳаси икки давлат ўртасидаги таълим соҳасидаги ҳамкорликнинг устувор йўналишларини тўлиқ қамраб олиши керак. Бу ўқитувчилар тайёрлаш, малака ошириш, тажриба алмашиш масалалари. Ўқитувчиларимизнинг Қозоғистонга ташрифини ташкиллаштириб, қозоқ ўқитувчиларини Ўзбекистонга таклиф қилишимиз мумкин. Тажриба ва фикр алмашишда фойдали бўлади, деб ўйлайман. Бир қатор қозоғистонлик ўқитувчилар билан суҳбатлашдим. Уларнинг ҳар бири сидқидилдан меҳнат қилиб, ўз юрти келажаги учун қайғураётганини пайқадим. Ўқитувчилар қандай билим бериш, ўқувчини шахс сифатида шакллантиришнинг аҳамияти ҳақида ўйлайди», — деди Ўзбекистон Республикаси таълим вазири Бахтиёр Саидов.
Нур-Султан мактабларига ташриф давомида Бахтиёр Саидов таълим дастурлари ва таълим жараёнига интеграциялашган рақамли лойиҳалар билан таништирилди. Шунингдек, Б. Саидов Қозоғистон мактабларида давлат-хусусий шериклик ва аҳоли жон бошига молиялаштириш тизими билан танишди.
Б. Саидов Ўзбекистон Қозоғистоннинг давлат-хусусий шериклик (ДХШ) тизимини ўрганишини, бу хусусий мактаблар ўртасидаги рақобатни кучайтириши, шунингдек, мактаб таълимини яхшилаш учун аҳоли жон бошига молиялаштиришга ўтиш ҳам ўрганилишини таъкидлади.
