Қозоғистон ва Ўзбекистон президентлари кенгайтирилган таркибда музокара ўтказди
Кичик гуруҳдаги учрашувдан сўнг Қасим-Жомарт Тоқаев ва Шавкат Мирзиёев икки мамлакат расмий делегациялари иштирокида кенгайтирилган гуруҳда музокаралар ўтказди.
Президентлар савдо-иқтисодий ҳамкорликни мустаҳкамлаш, жумладан, ўзаро товар айирбошлаш ҳажмини ошириш, сармояларни жалб этиш, саноат, фарматсевтика, қишлоқ хўжалиги, қурилиш, транзит салоҳияти ва транспорт логистикаси каби соҳалардаги ҳамкорликни ривожлантиришга алоҳида эътибор қаратдилар. Шунингдек, таълим ва маданий-гуманитар соҳалардаги ҳамкорлик масаласи ҳам муҳокама қилинди.
Давлат раҳбари кичик гуруҳда бўлиб ўтган музокаралар натижаларини юқори баҳолаб, дўстлик, яхши қўшничилик ва ўзаро ёрдам руҳидаги икки томонлама ҳамкорликни ҳар томонлама кенгайтириш ниятида эканини таъкидлади.
Қасим-Жомарт Тоқаев бугунги кунда мамлакатлар давлатлараро шериклик намунаси бўлган мустаҳкам ва баркамол муносабатлар ўрнатганини таъкидлади.
«Иттифоқчилик муносабатлари тўғрисидаги шартноманинг имзоланиши давлатлараро муносабатларимиз юксак даражада эканини кўрсатади. Агар шартномани тарихий аҳамиятга эга ҳужжат десак, менимча, бу муболаға эмас. Бу ўта муҳим ҳужжат биз учун янги имкониятлар очади ва икки давлатнинг ўзаро ҳамкорликни мустаҳкамлашга интилиши муштараклигини ифодалайди. Бундан ташқари, бугун Қозоғистон ва Ўзбекистон давлат чегараларини демаркация қилиш тўғрисидаги битим имзоланади. Ушбу тарихий келишув Қозоғистон жанубидаги давлат чегарасини халқаро ҳуқуқий маънода расмийлаштириш жараёнини тўлиқ якунлайди», — деди Президент.
Давлат раҳбари иттифоқчилик муносабатларини мустаҳкамлаш бўйича биргаликдаги ҳаракатлар бутун Марказий Осиёнинг барқарор ривожланиши ва тинчлигини таъминлашга салмоқли ҳисса қўшишини таъкидлади.
Шу билан бирга, музокаралар чоғида президентлар икки томонлама ҳамкорликнинг сиёсий платформасини мустаҳкамлашга хизмат қилувчи Олий давлатлараро кенгаш ва Парламентлараро кенгаш тузишга келишиб олдилар.
Қасим-Жомарт Тоқаевнинг айтишича, томонлар турли халқаро тузилмалар ва механизмлар доирасида муваффақиятли иш олиб бормоқда. Қозоғистон ва Ўзбекистон минтақавий ва халқаро кун тартибидаги кўплаб масалалар бўйича муштарак позиция ва қарашларга эга.
Ўз навбатида, Шавкат Мирзиёев кичик гуруҳдаги музокаралар самарали кечганини таъкидлаб, товар айирбошлаш ҳажми ортиб бораётгани, қўшма лойиҳалар муваффақиятли амалга оширилаётганини алоҳида таъкидлади.
– Давлат ташрифингиз кўп асрлик дўстлигимиз, дўстона қўшничилик ва ўзаро қўллаб-қувватлаш мустаҳкамлигини яна бир бор тасдиқлайди. Халқларимизнинг тарихи ва тақдири ўзаро боғланган. Мамлакатларимизнинг тарихий илдизлари муштарак, биз долзарб муаммоларни биргаликда ҳал қиламиз», - деди Ўзбекистон Президенти.
Томонлар маданий-гуманитар алоқаларнинг ривожланишини ҳам ижобий баҳоладилар. Икки мамлакат халқларининг умумий маънавий ва маданий қадриятларини бойитган Қозоғистон ва Ўзбекистон маданият кунлари муваффақиятли ўтказилди. Мамлакатлар таълим соҳасидаги ҳамкорлик масаласи ҳам кўриб чиқилди.
Фото: akorda.kz
