Қозоғистон ва Ўзбекистон Бош вазир ўринбосарлари ун, кўмир транзити тарифлари ва қўшма лойиҳаларни илгари суриш масалаларини муҳокама қилдилар

ASTANA. Kazinform – Астана шаҳрида Қозоғистон ва Ўзбекистон Ҳукумат раҳбарлари ўринбосарлари даражасидаги ишчи гуруҳининг навбатдаги йиғилиши бўлиб ўтди. Иштирокчилар икки давлат президентларининг 2022 йил декабрда бўлиб ўтган музокаралари якунлари бўйича амалга оширилиши режалаштирилган қўшма лойиҳалар, инвестиция келишувлари ва савдо шартномаларини амалга оширишнинг боришини кўриб чиқди, дея хабар беради Kazinform ҚР Савдо ва интеграция вазирлиги сайтига таяниб.

Қозоғистон ва Ўзбекистон Бош вазирларининг ўринбосарлари Серик Жуманғарин ва Жамшид Хўжаев қўшма йўл хариталарининг алоҳида лойиҳалари фаол илгари сурилаётганини таъкидлаб, ҳамкорлик алоқалари самарадорлигини оширишда юзага келаётган тўсиқларни бартараф этиш йўлларини муҳокама этди.

Учрашувда ўзаро ҳамкорлик самарадорлигини ошириш мақсадида чегара пунктларининг ўтказувчанлигини ошириш, Қозоғистон кўмирини Ўзбекистонга ташиш тарифларини ошириш, «Хитой-Қозоғистон-Ўзбекистон-Туркманистон-Эрон» мультимодаль транспорт йўналишини фаоллаштириш имкониятлари муҳокама қилинди.

Қозоғистон ун маҳсулотларининг Ўзбекистон ҳудуди орқали транзити учун тарифларни пасайтириш имкониятларини муҳокама қилишга алоҳида эътибор қаратилди. Ўзбекистон ҳудуди орқали Қозоғистондан Афғонистонга ун экспорти ҳажми тарихий максимал даражада 2017 йилда 1209 минг тоннага етди. Кейинги йилларда бу кўрсаткич сезиларли даражада камайди: 2021 йилда - 536 минг тонна, 2022 йилда - 816 минг тонна. Жорий йилнинг 6 ойи давомида – атиги 275 минг тонна.

Қозоғистоннинг Афғонистонга ун экспорти бўйича салмоқли салоҳиятини ҳисобга олиб, Қозоғистон томони Ўзбекистон орқали Афғонистонга темир йўл орқали транзит ташишда базавий тарифга имтиёзлар бериш имкониятини кўриб чиқиш илтимоси билан Ўзбекистон томонига мурожаат қилди. Йиғилиш иштирокчилари темир йўл ташувлари учун қулай тариф шартларини муҳокама қилиш ва аниқ таклифлар ишлаб чиқиш учун қўшма эксперт ишчи гуруҳи тузишга келишиб олди.

Икки томонлама ҳужжатларда иқтисодиётнинг турли тармоқларида йирик лойиҳалар режалаштирилган. Хусусан, Қарағанди вилоятида Artel маиший техника ишлаб чиқаришни йўлга қўйиш лойиҳаси ўз вақтида амалга оширилмоқда. Лойиҳа бир неча босқичларга бўлинган, ишга тушириш бошланиши - 2025 йил. Artel бренди остида печлар, чангютгичлар, телевизорлар, мини печлар, кир ювиш машиналари ишлаб чиқариш режалаштирилган. Ривожланиш салоҳияти 8,95 миллиард долларни ташкил этади, шундан 7,97 миллиард доллари экспортга мўлжалланган. Айни пайтда лойиҳа-смета ҳужжатларини ишлаб чиқиш якунланди, қурилиш-монтаж ишлари олиб борилмоқда, жиҳозларнинг 10 фоизга яқини етказиб берилди.

Режага кўра, Қостанай вилоятида «Chevrolet Onix» автомобилларини ишлаб чиқаришни йўлга қўйиш ишлари изчил давом эттириляпти. Лойиҳанинг ишга туширилиши 2024 йилнинг 1-чорагида «СарыаркаАвтоПром» заводи негизида режалаштирилган. Шартномалар тузилиб, пайвандлаш, бўяш, йиғиш цехлари учун ускуналар ишлаб чиқариляпти.

Чимкент ва Туркистон вилоятида тўқимачилик мажмуаларини яратиш лойиҳалари фаол амалга ошириляпти. 2023 йил апрелда томонлар «Zhanassyl» заводида ўзбек навли пахта чигитини тажриба тариқасида экиш ва кейинчалик қайта ишлаш бўйича келишиб олдилар. Ҳозир вилоятда 30 гектар майдонга янги «Наманган – 77» чигити сепилди.

Йирик инфратузилма лойиҳалари билан бир қаторда, томонлар агросаноат мажмуасидаги лойиҳалар бўйича ҳам фаол ҳамкорлик қилмоқда. Бу меваларни қайта ишлаш заводи, кунгабоқар ёғини қайта ишлаш заводи, 20 минг бош қорамолга мўлжалланган боқиш шохобчаси ва гўштни қайта ишлаш мажмуаси қурилиши ва бошқалар.