Қозоғистон ва Ўзбекистон ўртасида ҳаво рейслари кўпаяди
ASTANА. Кazinform – ҚР Транспорт вазири Марат Қарабаев Ўзбекистон Республикаси Транспорт вазири Илҳом Маҳкамов билан учрашди.
Учрашувда ҳамкорликнинг асосий йўналишлари ва ҳамкорликни янада мустаҳкамлаш имкониятлари, шунингдек, халқаро транспорт коридорларини ривожлантириш, темир йўл ва автомобиль транспорти, транспорт инфратузилмасини қуриш соҳаларида қўшма лойиҳаларни амалга ошириш масалалари муҳокама қилинди.
Жумладан, Дарбаза ва Мақтаарал ўртасида янги темир йўл линияси қурилиши давом этмоқда.
Лойиҳанинг амалга оширилиши икки давлат ўртасидаги юк ташиш ҳажмини яна 10 миллион тоннага ошириш имконини бериши режалаштирилган.
Автомобиль транспорти соҳасидаги ҳамкорлик ҳақида гапирганда, мамлакатлар ўртасидаги автомобиль юк ташувлари ҳукуматлараро келишув асосида амалга оширилаётганини таъкидлаш лозим.
"Ўтган йили автомобилларда экспорт-импорт юк ташиш ҳажми 6 фоизга ошиб, 1,8 миллион тоннани ташкил этди. Умумий юк ташиш соҳасида ҳамкорликни ривожлантиришда ижобий силжиш кузатилмоқда”, — деди Марат Қарабаев.
Фуқаро авиацияси транспорт-логистика марказининг асосий ҳаракатлантирувчи кучи ҳисобланади. Ҳозирда Қозоғистон ва Ўзбекистон шаҳарлари ўртасида ҳафтасига 37 та рейс амалга оширилмоқда.
Ўтган йили Тошкентда Қозоғистон ва Ўзбекистон авиация маъмуриятлари ўртасида музокаралар бўлиб ўтган эди.
Музокаралар чоғида рейслар сонини янада ошириш ва парвозлар географиясини кенгайтириш, Астана-Тошкент йўналиши бўйича рухсат этилган рейслар сонини ҳафтасига 12 тадан 36 тага, Алмати-Тошкент йўналиши бўйича ҳафтасига 20 тадан 36 та рейсга кўпайтириш, бошқа йўналишларда эса ҳафтасига 4 тагача рейсни оширишга келишиб олдилар.
“Термиз-Мозори-Шариф-Кобул-Пешовар” темир йўли қурилиши борасида Қозоғистон томони Ўзбекистоннинг ушбу ташаббусини қўллаб-қувватлайди.
“Ишончим комилки, лойиҳанинг амалга оширилиши Марказий Осиё мамлакатлари учун минтақавий алоқалар ва савдо-сотиқни ривожлантиришга хизмат қилади, чунки Жанубий Осиё минтақасининг йирик денгиз портларига чиқиш йўллари очилади”, — деди вазирлик раҳбари.
Умуман олганда, икки давлат ўртасида юк ташиш ва транзит ҳукуматлараро келишувга мувофиқ рухсатномасиз амалга оширилади.
Учрашув якунларига кўра, томонлар Қозоғистон ва Ўзбекистон ўртасида 2024-2025 йилларда транспорт ва логистика соҳасидаги стратегик ҳамкорликни ривожлантириш бўйича “Йўл харитаси”ни имзоладилар.
Учрашув якунлангач, кун тартибидаги долзарб масалалар юзасидан фикр алмашилди.
